بھارتی بارڈر سیکیورٹی فورس سے وابستہ ایک ڈرون مبینہ طور پر بنگلہ دیشی حدود کے اندر لال منیرہاٹ ضلع کے بریمارِی بارڈر کے قریب گر کر تباہ ہو گیا۔
یہ واقعہ منگل کی دوپہر پٹگرام سب ضلع کی حدود موگلی باری سرحدی علاقے میں پیش آیا، جہاں ڈرون مبینہ طور پر بنگلہ دیش کی حدود میں تقریباً 20 گز اندر داخل ہوا اور پھر ایک مکئی کے کھیت میں جا گرا۔
یہ بھی پڑھیں: سرحد پار اسمگلنگ کے خلاف بارڈر گارڈ بنگلہ دیش متحرک، بڑی کھیپ برآمد
حکام کے مطابق یہ واقعہ سرحدی مین ستون 841 کے سب پِلر نمبر 8 کے قریب پیش آیا، بعد ازاں بنگلہ دیش بارڈر گارڈ کے اہلکاروں نے جائے وقوعہ سے ڈرون برآمد کر لیا۔
سرحدی ذرائع کے مطابق یہ ڈرون بھارت کی بی ایس ایف کی 98ویں بٹالین کے اہلکار اڑا رہے تھے جو سرحد کے دوسری جانب ہمالین کیمپ میں تعینات ہیں۔
عینی شاہدین نے بتایا کہ ایک زور دار بھنبھناہٹ کی آواز سنی گئی جس کے بعد ڈرون سرحد عبور کر کے بنگلہ دیشی علاقے میں گر گیا، جس سے قریبی کھیتوں میں کام کرنے والے کسانوں میں خوف و ہراس پھیل گیا۔
مزید پڑھیں: بنگلہ دیش میں اپریل کے دوران ہجوم کے تشدد کے 49 واقعات، 21 افراد ہلاک، رپورٹ
تیستا 61 بارڈر گارڈ بنگلہ دیش بٹالین کے کمانڈنگ افسر لیفٹیننٹ کرنل سید فضل منعم نے ڈرون کی برآمدگی کی تصدیق کرتے ہوئے بتایا کہ بی ایس ایف نے اس معاملے پر بنگلہ دیشی حکام سے رابطہ کیا ہے۔
انہوں نے کہا کہ اعلیٰ حکام کی ہدایت کے مطابق مزید کارروائی کی جائے گی، واقعے میں کسی جانی یا مالی نقصان کی اطلاع نہیں ملی۔
