نائب وزیراعظم و وزیر خارجہ محمد اسحاق ڈار نے شنگھائی تعاون تنظیم (ایس سی او) کے سربراہانِ مملکت کونسل کی 2026-27 کی چیئرمین شپ سنبھالنے کے حوالے سے پاکستان کی تیاریوں کا جائزہ لیا اور متعلقہ اداروں کو 2027 میں ہونے والی سربراہی کانفرنس کی کامیاب میزبانی کے لیے جامع منصوبہ بندی اور مؤثر رابطہ کاری یقینی بنانے کی ہدایت کی ہے۔
اجلاس میں مختلف وزارتوں اور اداروں کی جانب سے جاری تیاریوں پر بریفنگ دی گئی۔ اس موقع پر اسحاق ڈار نے تمام متعلقہ وزارتوں اور محکموں کو ہدایت کی کہ 2027 میں ہونے والی ایس سی او سربراہی کانفرنس کی کامیاب میزبانی کے لیے مکمل منصوبہ بندی، مؤثر رابطہ کاری اور بروقت اقدامات یقینی بنائے جائیں۔
یہ بھی پڑھیے شنگھائی تعاون تنظیم نہ صرف سیکیورٹی بلکہ خطّے میں معاشی ترقی کا ذریعہ بھی ہے، اسحاق ڈار
انہوں نے کہا کہ پاکستان ایک اہم علاقائی ملک کی حیثیت سے ایس سی او کے پلیٹ فارم کو خصوصی اہمیت دیتا ہے اور آئندہ چیئرمین شپ پاکستان کے علاقائی تعاون، روابط کے فروغ اور کثیرالجہتی سفارت کاری سے وابستگی کی عکاس ہوگی۔
نائب وزیراعظم نے اس بات پر بھی زور دیا کہ تمام انتظامی، لاجسٹک اور سفارتی تیاریوں کو اعلیٰ معیار کے مطابق مکمل کیا جائے، جبکہ اداروں کے درمیان رابطہ کاری کو مزید مؤثر بنایا جائے۔
یہ بھی پڑھیں: شنگھائی تعاون تنظیم اجلاس: ایس سی او ڈیولپمنٹ بینک اور فنڈ بنانے پر اتفاق
اجلاس میں وزیراعظم کے معاونِ خصوصی طارق باجوہ، معاونِ خصوصی برائے خارجہ امور طارق فاطمی، سیکریٹری خارجہ سفیر آمنہ بلوچ، اسپیشل سیکریٹری داخلہ و انسدادِ منشیات، چیئرمین سی ڈی اے، آئی جی اسلام آباد پولیس اور وزارت خارجہ سمیت دیگر متعلقہ اداروں کے اعلیٰ حکام نے شرکت کی۔
