پاکستانی ٹیسٹ ٹیم کے کپتان شان مسعود نے بنگلہ دیش کے خلاف پہلے ٹیسٹ سے قبل قومی ٹیم کے بولنگ اٹیک پر مکمل اعتماد کا اظہار کرتے ہوئے کہا ہے کہ ٹیم مختلف کنڈیشنز میں عمدہ کارکردگی دکھانے کی صلاحیت رکھتی ہے۔
پاکستان اور بنگلہ دیش کے درمیان 2 ٹیسٹ میچوں کی سیریز کا پہلا مقابلہ جمعہ سے میرپور میں شروع ہوگا۔ پاکستانی ٹیم گزشتہ دورۂ بنگلہ دیش کی تلخ یادیں بھلانے کے لیے پُرعزم ہے، جہاں 2024 میں میزبان ٹیم نے راولپنڈی میں دونوں ٹیسٹ جیت کر پاکستان کو وائٹ واش کیا تھا۔
یہ بھی پڑھیے: بھارت پاکستانی ایتھلیٹس کے لیے دروازے کھولنے پر مجبور، کرکٹ سیریز پر پابندی برقرار
پری سیریز پریس کانفرنس میں شان مسعود نے کہا کہ ٹیم پوری توجہ کے ساتھ سیریز میں اتر رہی ہے اور بنگلہ دیش کو اس کی ہوم کنڈیشنز میں چیلنج کرنا آسان نہیں ہوگا۔ ان کا کہنا تھا کہ بنگلہ دیش کے پاس بیٹنگ، بولنگ اور فیلڈنگ تینوں شعبوں میں معیاری کھلاڑی موجود ہیں۔
انہوں نے کہا، ‘ہم نے متوازن اسکواڈ منتخب کیا ہے جو اسپن اور سیم دونوں طرح کی وکٹوں پر کھیلنے کا تجربہ رکھتا ہے۔ ٹیسٹ کرکٹ میں کامیابی کے لیے 20 وکٹیں لینا بنیادی شرط ہے اور ہمیں اپنے بولنگ اٹیک پر مکمل اعتماد ہے۔’
دوسری جانب بنگلہ دیشی کپتان نجم الحسن شانتو نے کہا کہ ان کی ٹیم کو پہلی اننگز میں بڑا اسکور کرنا ہوگا تاکہ فاسٹ بولرز کو حریف ٹیم کی تمام وکٹیں لینے کا موقع مل سکے۔ انہوں نے دعویٰ کیا کہ بنگلہ دیش کا پیس اٹیک پاکستان کے مقابلے میں معمولی برتری رکھتا ہے۔
یہ بھی پڑھیے: پاکستان اور زمبابوے کی ویمن کرکٹ ٹیموں کے درمیان ون ڈے سیریز کا آغاز کل ہوگا، دونوں ٹیمیں پرجوش
بنگلہ دیشی اسکواڈ میں اوپنر تنزید حسن تمیم کو شامل کیا گیا ہے جبکہ فاسٹ بولر تسکین احمد انجری کے بعد ٹیم میں واپس آئے ہیں۔
ادھر پاکستانی ٹیم کو بابر اعظم کی حالیہ فارم سے حوصلہ ملا ہے، تاہم پریکٹس سیشن کے بعد ان کا اسکین کیا گیا جس کے باعث پہلے ٹیسٹ میں ان کی شرکت تاحال غیر یقینی بتائی جا رہی ہے۔
پہلا ٹیسٹ 8 سے 12 مئی تک میرپور جبکہ دوسرا ٹیسٹ 16 سے 20 مئی تک سلہٹ میں کھیلا جائے گا۔
