معروف یوٹیوبر رجب بٹ نے بالی ووڈ سپر اسٹار سلمان خان سے موازنہ کیے جانے پر ردعمل دیتے ہوئے کہا ہے کہ ان کا سلمان خان کے ساتھ کوئی مقابلہ نہیں اور سوشل میڈیا پر انہیں بلاوجہ تنقید کا نشانہ بنایا گیا۔
حال ہی میں معروف پوڈکاسٹر نادر علی کو دیے گئے ایک انٹرویو میں رجب بٹ نے اس تاثر پر کھل کر گفتگو کی۔ انہوں نے کہا کہ وہ خود کو سلمان خان جیسا ہرگز نہیں سمجھتے البتہ اسکول کے زمانے میں انہوں نے اداکار سے متاثر ہو کر ان کا انداز اپنانے کی کوشش کی تھی۔
انہوں نے کہا کہ نویں جماعت میں میں نے سلمان خان سے متاثر ہو کر دونوں کان چھدوائے اور باڈی بلڈنگ شروع کی تھی۔ حالیہ واقعہ صرف مداحوں سے ملاقات کا تھا جہاں لوگ ہاتھ ہلا رہے تھے، میرا نام پکار رہے تھے اور شاعری سنا رہے تھے، جس پر میں نے بھی جواباً ہاتھ ہلایا۔ لیکن سوشل میڈیا صارفین نے اسے سلمان خان کی نقل قرار دے کر تنقید شروع کر دی۔
یہ بھی پڑھیں: طلاق کے بعد رجب بٹ کا بڑا اعلان، دوسری شادی پر خاموشی توڑدی
انہوں نے مزید کہا کہ سلمان خان کا مقام اور حیثیت الگ ہے کیونکہ انہوں نے برسوں کی محنت سے اپنی پہچان بنائی ہے اس لیے ان کا کسی بھی صورت سلمان خان سے موازنہ نہیں کیا جا سکتا۔
واضح رہے کہ رجب بٹ پاکستان کے مقبول ترین ڈیجیٹل کریئیٹرز میں شمار ہوتے ہیں۔ ان کے یوٹیوب پر 80 لاکھ سے زائد سبسکرائبرز جبکہ انسٹاگرام پر لاکھوں فالوورز موجود ہیں تاہم وہ اکثر مختلف تنازعات کی وجہ سے خبروں کی زینت بنے رہتے ہیں۔
