جنوبی لبنان میں اسرائیلی فضائی حملوں کے نتیجے میں کم از کم 20 افراد ہلاک ہو گئے، جن میں ایک شہری دفاع کا کارکن بھی شامل ہے۔ لبنانی سرکاری میڈیا کے مطابق حملے مختلف علاقوں میں کیے گئے اور امدادی کارروائیاں جاری ہیں۔
مزید پڑھیں:لبنان اور اسرائیل کے درمیان نئے مذاکرات 14 مئی کو واشنگٹن میں ہوں گے
لبنان کی وزارت صحت نے بتایا کہ ضلع صور کے قصبے طورا میں ایک حملے میں 4 افراد مارے گئے جن میں 2 خواتین شامل ہیں، جبکہ متعدد افراد زخمی ہوئے۔ بعض علاقوں میں ملبے تلے دبے افراد کی تلاش بھی جاری ہے۔
لبنانی قومی خبر رساں ادارے کے مطابق نبطیہ، بنت جبیل اور صیدا سمیت کئی علاقوں میں بھی فضائی حملے ہوئے جن میں مزید ہلاکتیں رپورٹ کی گئی ہیں۔ گزشتہ 24 گھنٹوں میں مجموعی طور پر 50 افراد کی ہلاکت کی اطلاعات بھی سامنے آئی ہیں۔
دوسری جانب اسرائیلی فوج نے دعویٰ کیا ہے کہ اس کی کارروائیوں کا ہدف حزب اللہ کے جنگجو تھے، جبکہ حزب اللہ نے بھی اسرائیلی فوجی ٹھکانوں پر جوابی حملوں کی ذمہ داری قبول کی ہے۔
مزید پڑھیں:جنوبی لبنان میں معصوم مسیحیوں پر اسرائیلی حملے، خانقاہ اور راہبات کا اسکول تباہ
اس کشیدہ صورتحال کے دوران دونوں ممالک کے درمیان امریکا کی میزبانی میں مذاکرات کا نیا دور 14 اور 15 مئی کو واشنگٹن میں متوقع ہے، جس کا مقصد جنگ بندی کو مضبوط بنانا اور دیرپا امن کی کوشش کرنا بتایا گیا ہے۔
