عاطف اسلم کے کراچی میں ہونے والے کنسرٹ کے دوران اس وقت مختصر ہنگامہ آرائی دیکھنے میں آئی جب ایک خاتون مداح اسٹیج پر چڑھ گئیں اور گلوکار کے ساتھ سیلفیاں بنانے لگیں۔
یہ واقعہ ڈی ایچ اے اسپورٹس کلب میں ہونے والی پرفارمنس کے دوران پیش آیا۔ سوشل میڈیا پر وائرل ویڈیوز میں دیکھا جاسکتا ہے کہ عاطف اسلم گانا پیش کررہے تھے کہ اسی دوران ایک خاتون مداح اسٹیج پر پہنچ گئیں۔ گلوکار نے ابتدا میں خوشگوار انداز اپناتے ہوئے مداح کے ساتھ تصویر بنوائی اور ماحول کو دوستانہ رکھنے کی کوشش کی۔
یہ بھی پڑھیے: پی ایس ایل فائنل سے قبل رنگا رنگ تقریب کی تیاریاں، عاطف اسلم، آئمہ بیگ آواز کا جادو جگانے کے لیے تیار
تاہم صورتحال اس وقت تبدیل ہوگئی جب خاتون پہلی تصویر کے بعد بھی اسٹیج سے نیچے نہ اتریں اور مسلسل مزید سیلفیاں لینے کی کوشش کرتی رہیں۔ ایونٹ عملے نے متعدد بار انہیں واپس جانے کا اشارہ دیا لیکن وہ عاطف اسلم کے قریب آتی رہیں۔
View this post on Instagram
بعد ازاں منتظمین اور سیکیورٹی اہلکاروں نے مداخلت کرتے ہوئے خاتون کو اسٹیج سے نیچے اتارا، جس کے بعد کنسرٹ دوبارہ معمول کے مطابق جاری رہا۔
واقعے کی ویڈیوز سوشل میڈیا پر تیزی سے وائرل ہوگئیں، جہاں صارفین نے کنسرٹس میں سیکیورٹی اور ہجوم پر قابو پانے کے انتظامات پر سوالات اٹھائے۔ کئی افراد نے فنکاروں کی حفاظت کو یقینی بنانے کے لیے سخت اقدامات کا مطالبہ بھی کیا۔
یہ بھی پڑھیے: پی ایس ایل 11 ترانہ: عاطف اسلم اور آئمہ بیگ ایک ساتھ جلوہ گر، نئی آوازیں بھی شامل
یہ پہلا موقع نہیں کہ کسی لائیو کنسرٹ کے دوران مداح اسٹیج تک پہنچ گئے ہوں، تاہم حالیہ واقعے نے ایک بار پھر بڑے عوامی پروگرامز میں سیکیورٹی انتظامات کی اہمیت اجاگر کردی ہے۔
