چیف جسٹس یحییٰ آفریدی نے برابری، وقار اور عدم امتیاز کی آئینی اقدار پر عملدرآمد کے عزم کا اعادہ کرتے ہوئے اداروں میں محفوظ، باوقار اور جامع پیشہ ورانہ ماحول کی اہمیت پر زور دیا ہے۔
وفاقی محتسب برائے انسدادِ ہراسانی فوزیہ وقار نے چیف جسٹس یحییٰ آفریدی سے ملاقات میں صنفی بنیادوں پر انصاف، کام کی جگہ پر وقار اور ہراسانی کے خلاف تحفظ سے متعلق امور پر تبادلہ خیال کیا۔
یہ بھی پڑھیں: سپریم کورٹ میں کام کی رفتار تیز، آئینی بینچ نے 3 روز میں کون سے اہم مقدمات سنے؟
اعلامیے کے مطابق وفاقی محتسب فوزیہ وقار نے عدلیہ کی جانب سے اصلاحاتی اقدامات اور صنفی انصاف کے فروغ کے لیے کی جانے والی کاوشوں کو سراہا۔
ملاقات میں ہراسانی کے خلاف تحفظ کے لیے موجود ادارہ جاتی میکانزم، سرکاری و نجی اداروں میں محفوظ اور جامع کام کے ماحول کو یقینی بنانے اور متاثرین کو دستیاب قانونی علاج سے متعلق آگاہی بڑھانے پر گفتگو کی گئی۔
مزید پڑھیں: سرمایہ کاروں کے اعتماد کے لیے اقدامات، بینکاری نظام میں قانونی اصلاحات کا فیصلہ
وفاقی محتسب فوزیہ وقار نے چیف جسٹس کو اپنے ادارے کے کردار اور مینڈیٹ کے حوالے سے بریفنگ دیتے ہوئے کام کی جگہ پر ہراسانی سے متعلق قوانین کے مؤثر نفاذ کے لیے ادارہ جاتی ہم آہنگی بڑھانے کی ضرورت پر زور دیا۔
ملاقات میں معاشرے کے کمزور اور پسماندہ طبقات کے لیے ادارہ جاتی ردعمل کو مزید مؤثر بنانے پر بھی غور کیا گیا۔
