ڈھاکا ٹیسٹ میں بنگلہ دیش نے پاکستان کو 104 رنز سے شکست دے کر سیریز کے پہلے میچ میں کامیابی حاصل کرلی۔
دوسری اننگز میں 268 رنز کے ہدف کے تعاقب میں پاکستانی بیٹنگ لائن مشکلات کا شکار رہی اور پوری ٹیم 163 رنز پر ڈھیر ہوگئی۔
پاکستان کی پہلی وکٹ صرف 3 رنز پر گری جبکہ اذان اویس 15 رنز بنا کر آؤٹ ہوئے۔
کپتان شان مسعود صرف 2 رنز بنا سکے، عبداللہ فضل نے 66 رنز کی نمایاں اننگز کھیلی۔
اس کے علاوہ سلمان آغا 26، سعود شکیل 15، حسان خان 12 رنز بنا سکے، جبکہ حسن علی ایک اور نعمان علی 4 رنز کے ساتھ پویلین واپس لوٹے۔
میچ کے پانچویں روز بنگلادیش نے اپنی دوسری اننگز 9 کھلاڑی آؤٹ پر 240 رنز بنا کر ڈکلیئر کی۔ میزبان ٹیم کی جانب سے کپتان نجم الحسن شنتو نے 87 اور مومن الحق نے 56 رنز اسکور کیے۔
پاکستان کے بولرز میں حسن علی اور نعمان علی نے 3،3 وکٹیں حاصل کیں جبکہ شاہین آفریدی نے 2 اور محمد عباس نے ایک کھلاڑی کو آؤٹ کیا۔ اس میچ میں نعمان علی نے ٹیسٹ کرکٹ میں اپنی 100 وکٹیں مکمل کرنے کا اعزاز بھی حاصل کیا۔
یاد رہے کہ اس میچ میں پاکستان نے ٹاس جیت کر پہلے فیلڈنگ کا فیصلہ کیا تھا۔ بنگلہ دیش نے پہلی اننگز میں 413 رنز بنائے تھے جبکہ پاکستان کی ٹیم پہلی باری میں 386 رنز پر آؤٹ ہوگئی تھی۔
