لاہور میں روز گرج چمک کے ساتھ موسلا دھار بارش اور ژالہ باری ہوئی، جس کے نتیجے میں شہر کے متعدد نشیبی علاقے پانی میں ڈوب گئے ہیں، اہم شاہراہوں پر ٹریفک کی روانی بری طرح متاثر ہوگئی۔
محکمہ موسمیات نے پہلے ہی 10 سے 13 مئی کے دوران ملک کے بالائی علاقوں بشمول لاہور میں بارشوں کی پیشگوئی کر رکھی تھی۔
یہ بھی پڑھیں: لاہور میں موسلادھار بارش، 171 ملی میٹر بارش ریکارڈ، چھت گرنے سے ایک ہی خاندان کے 5 افراد جاں بحق
واسا کے اعداد و شمار کے مطابق شام 6:35 بجے تک سب سے زیادہ بارش لکشمی چوک میں 95 ملی میٹر ریکارڈ کی گئی۔ دیگر علاقوں میں پانی والا تالاب میں 79، سگیاں میں 53.2، گلشنِ راوی میں 45.8 اور جیل روڈ پر 44 ملی میٹر بارش ہوئی۔
🛑 لاہور میں تیز ہواؤں کے ساتھ بارش اور ژالہ باری ⚡⛈️ pic.twitter.com/Tc6Yz3PIoG
— WeatherWalay (@weatherwalay) May 13, 2026
شہر کے مختلف علاقوں میں بارش کی اوسط شرح 34 ملی میٹر رہی، تاہم رپورٹنگ کے وقت تمام علاقوں میں بارش تھم چکی تھی۔
صوبائی ڈیزاسٹر مینجمنٹ اتھارٹی (پی ڈی ایم اے) نے شہریوں کو احتیاطی تدابیر اختیار کرنے اور بجلی کے کھمبوں و تاروں سے دور رہنے کی ہدایت کی ہے۔
یہ بھی پڑھیں: ملک کے مختلف حصوں میں بارش اور تیز ہواؤں کا امکان، جنوبی علاقوں میں گرمی برقرار
پی ڈی ایم اے کے ڈائریکٹر جنرل عمر جاوید نے ضلعی انتظامیہ کو متاثرہ علاقوں سے پانی کے فوری نکاس کو یقینی بنانے کا حکم دیا ہے اور کہا ہے کہ ریسکیو 1122 اور واسا کی ٹیمیں فیلڈ میں موجود رہیں۔
لاہور میں شدید بارش اور ژالہ باری🥺🫣🙏 pic.twitter.com/pqvpkngRKR
— Muhammad Ashfaq (@ashfaqsasrana) May 13, 2026
واسا کے ایم ڈی غفران احمد اور صوبائی وزیر بلال یاسین نے لکشمی چوک سمیت مختلف علاقوں کا دورہ کر کے نکاسیِ آب کے کاموں کا جائزہ لیا۔
واسا حکام کو ہدایت کی گئی ہے کہ تمام ڈسپوزل اسٹیشنز کو مکمل فعال رکھا جائے اور خاص طور پر گڑھی شاہو، مال روڈ اور دیگر نشیبی علاقوں کی خصوصی نگرانی کی جائے تاکہ شہریوں کو درپیش مشکلات کا فوری ازالہ ہوسکے۔
