پاکستان اور چین کے درمیان سفارتی تعلقات کے 75 سال مکمل ہونے پر دونوں ممالک کی دیرینہ دوستی اور اسٹریٹجک شراکت داری کو ایک بار پھر اجاگر کیا گیا ہے۔ سی پیک تعاون سے معیشت اور ترقی کے نئے در وا ہوئے ہیں۔
چینی سفارتخانے کی جانب سے جاری فیکٹ شیٹ میں پاک چین تعلقات کو ’آہنی دوستی‘ اور ’آل ویدر اسٹریٹجک کوآپریٹو پارٹنرشپ‘ قرار دیتے ہوئے اسے عالمی سطح پر باہمی ترقی اور دوستانہ تعلقات کی ایک مثالی مثال بتایا گیا ہے۔
مزید پڑھیں: پاکستان میں ایران امریکا امن مذاکرات کے دوران ٹی وی چینلز پر آشا بھوسلے کی جھنکار ناقابل فہم
فیکٹ شیٹ کے مطابق چین پاکستان اقتصادی راہداری (سی پیک) کے تحت اب تک قریباً 25.93 ارب ڈالر کی سرمایہ کاری کی جا چکی ہے، جس سے 2 لاکھ 61 ہزار سے زائد روزگار کے مواقع پیدا ہوئے۔ اس کے علاوہ 510 کلومیٹر سے زائد سڑکوں کی تعمیر، 886 کلومیٹر طویل ٹرانسمیشن لائنز اور 8000 میگاواٹ سے زائد بجلی قومی نظام میں شامل کی گئی۔
اعداد و شمار کے مطابق چین مسلسل 12 سال سے پاکستان کا سب سے بڑا تجارتی شراکت دار ہے جبکہ 2025 میں دوطرفہ تجارت کا حجم 25 ارب ڈالر سے تجاوز کر گیا۔ پاکستان میں غیر ملکی سرمایہ کاری (FDI) میں بھی چین کا حصہ 53.2 فیصد رہا۔
This year marks the 75th anniversary of the establishment of the diplomatic relationship between China and Pakistan. As ironclad friends and all-weather strategic cooperative partners, the two countries have set a model for friendly coexistence and common development. Please look… pic.twitter.com/N0awmBuJlF
— Chinese Emb Pakistan (@CathayPak) April 20, 2026
فیکٹ شیٹ میں مختلف صوبوں میں جاری ترقیاتی منصوبوں کی تفصیلات بھی شامل ہیں۔ پنجاب میں ساہیوال کول پاور پلانٹ، لاہور اورنج لائن میٹرو ٹرین اور چشمہ نیوکلیئر پاور پلانٹس جیسے بڑے منصوبے مکمل کیے گئے، جبکہ بلوچستان میں گوادر بندرگاہ، بین الاقوامی ہوائی اڈہ، فری زون اور ڈی سیلینیشن پلانٹ خطے کی ترقی میں اہم کردار ادا کر رہے ہیں۔
خیبر پختونخوا میں سکی کناری ہائیڈرو پاور پراجیکٹ اور قراقرم ہائی وے فیز ٹو جبکہ سندھ میں تھر کول منصوبے، نیوکلیئر پاور پلانٹس اور ہوا سے بجلی پیدا کرنے کے منصوبے توانائی کے شعبے میں اہم اضافہ ثابت ہوئے ہیں۔
صنعتی تعاون کے تحت خصوصی اقتصادی زونز میں سرمایہ کاری سے ہزاروں ملازمتیں پیدا ہو رہی ہیں جبکہ زراعت، خلائی تحقیق اور تعلیم کے شعبوں میں بھی تعاون بڑھ رہا ہے۔ پاکستان کے سیٹلائٹس کی لانچنگ سے لے کر ہزاروں طلبا کی چین میں تعلیم تک، دونوں ممالک کے درمیان تعلقات مزید مستحکم ہو رہے ہیں۔
مزید پڑھیں: پاکستان اور سعودی عرب کے وزرائے خارجہ کا ٹیلی فونک رابطہ، مشرق وسطیٰ کے لیے پاک چین 5 نکاتی منصوبہ زیرِ غور
فیکٹ شیٹ میں حالیہ برسوں میں قدرتی آفات کے دوران چین کی جانب سے امداد، صحت اور تعلیم کے شعبوں میں تعاون کو بھی اجاگر کیا گیا ہے۔ دونوں ممالک کے درمیان عوامی سطح پر روابط، میڈیا تعاون اور ثقافتی تبادلوں میں بھی نمایاں اضافہ ہوا ہے۔
چینی سفارتخانے کے مطابق پاک چین دوستی نہ صرف خطے میں استحکام اور ترقی کا ضامن ہے بلکہ مشترکہ خوشحالی کی ایک روشن مثال بھی ہے۔
