نائب وزیراعظم اور وزیر خارجہ اسحاق ڈار نے کہا ہے کہ امریکا کی جانب سے سمندر میں تحویل میں لیے گئے جہازوں پر موجود 11 پاکستانی اور برادر ملک ایران کے 20 شہریوں کی کامیاب وطن واپسی ممکن بنا دی گئی ہے۔ انہوں نے بتایا کہ تمام افراد خیریت سے ہیں اور جلد اسلام آباد پہنچ جائیں گے۔
Alhamdolillah, I am pleased to share that we have been successful in the repatriation of 11 Pakistani nationals, alongside 20 nationals of our brotherly country Iran, through Singapore, who were aboard vessels seized in the high seas by the United States.
All individuals are in…
— Ishaq Dar (@MIshaqDar50) May 15, 2026
اسحاق ڈار نے سماجی رابطے کی ویب سائٹ ایکس پر اپنے بیان میں کہا کہ پاکستانی اور ایرانی شہریوں کو سنگاپور کے ذریعے بحفاظت منتقل کیا گیا، جہاں سے وہ بنکاک پہنچے اور بعد ازاں اسلام آباد کے لیے پرواز پر سوار ہو گئے۔ انہوں نے کہا کہ ایرانی شہریوں کو بھی بعد میں اپنے وطن واپسی میں سہولت فراہم کی جائے گی۔
یہ بھی پڑھیں:امریکی تحویل میں لیا گیا ایرانی جہاز عملے کے 22 ارکان سمیت پاکستان کے حوالے
وزیر خارجہ نے کہا کہ بیرون ملک مقیم پاکستانیوں، خصوصاً مشکل حالات میں پھنسے شہریوں کی حفاظت اور فلاح حکومت کی اولین ترجیح ہے۔ انہوں نے اس کامیاب کارروائی میں تعاون پر سنگاپور کے وزیر خارجہ ویوین بالا، سنگاپور حکومت، ایرانی وزیر خارجہ عباس عراقچی، امریکی حکومت اور امریکی وزیر خارجہ مارکو روبیو، جبکہ تھائی لینڈ حکومت کا بھی شکریہ ادا کیا۔
یہ بھی پڑھیں:امریکی تحویل میں لیے گئے جہاز سے ہمارا کوئی تعلق نہیں، چین کا ردعمل
اسحاق ڈار نے وزارت خارجہ، وزارت داخلہ اور سنگاپور و تھائی لینڈ میں تعینات پاکستانی سفارتی مشنز کی کوششوں کو بھی سراہتے ہوئے کہا کہ تمام اداروں کے بروقت رابطوں اور مؤثر تعاون کے باعث واپسی کا عمل محفوظ اور کامیابی سے مکمل ہوا۔
