اسرائیل اور لبنان نے گزشتہ ماہ سے جاری جنگ بندی میں مزید 45 روز کی توسیع پر اتفاق کر لیا ہے۔ امریکی محکمہ خارجہ کے مطابق اس فیصلے کا مقصد دونوں ممالک کے درمیان مذاکراتی عمل کو آگے بڑھانا اور خطے میں پائیدار امن کے لیے مزید پیش رفت کرنا ہے۔
یہ بھی پڑھیں: جنوبی لبنان پر اسرائیلی حملوں میں 20 افراد ہلاک، متعدد زخمی
امریکی محکمہ خارجہ کے ترجمان ٹومی پیگوٹ نے واشنگٹن میں ہونے والے دو روزہ مذاکرات کو انتہائی تعمیری قرار دیا ہے۔ انہوں نے تصدیق کی کہ 16 اپریل کو ہونے والی جنگ بندی میں توسیع کر دی گئی ہے اور اب دونوں فریقین مذاکرات کے اگلے دور کے لیے 2 اور 3 جون کو دوبارہ سر جوڑ کر بیٹھیں گے۔
واشنگٹن میں ہونے والی یہ ملاقات گزشتہ تین ماہ کے دوران فریقین کے درمیان تیسرا بڑا رابطہ ہے، جو مشرقِ وسطیٰ میں جاری وسیع تر کشیدگی کو کم کرنے کی کوششوں کا حصہ ہے۔ اگرچہ اپریل سے جنگ بندی نافذ ہے، تاہم جنوبی لبنان کے سرحدی علاقوں میں اب بھی تناؤ کی صورتحال برقرار ہے۔
یہ بھی پڑھیں: اسرائیل لبنان میں شہریوں پر حملے بند کرے، امریکا
یاد رہے کہ رواں برس مارچ میں ایران اور امریکہ کے درمیان شروع ہونے والی جنگ کے بعد اسرائیل نے لبنان میں اپنی زمینی کارروائیوں کا دائرہ وسیع کر دیا تھا۔ حالیہ جنگ بندی میں توسیع کو خطے میں مکمل استحکام کی جانب ایک اہم قدم کے طور پر دیکھا جا رہا ہے۔
