امریکی صدر ڈونلڈ ٹرمپ نے کہا ہے کہ امریکی افواج اور نائجیریا کی مسلح افواج نے مشترکہ کارروائی میں داعش کے عالمی سطح پر دوسرے بڑے کمانڈر ابو بلال المنوکی کو ہلاک کر دیا ہے۔ ٹرمپ کے مطابق یہ کارروائی انتہائی پیچیدہ منصوبہ بندی کے تحت کامیابی سے انجام دی گئی۔
سوشل میڈیا پلیٹ فارم ٹروتھ سوشل پر جاری اپنے بیان میں صدر ٹرمپ نے کہا کہ ابو بلال المنوکی دنیا کے سب سے سرگرم دہشتگردوں میں شمار ہوتا تھا اور اسے یقین تھا کہ وہ افریقہ میں چھپ کر محفوظ رہے گا، تاہم امریکی اداروں کو اس کی سرگرمیوں سے متعلق مسلسل معلومات مل رہی تھیں۔
یہ بھی پڑھیں:جاسوسی کا خوف: صدر ٹرمپ کے عملے نے چین سے واپسی پر تمام سرکاری تحائف اور فون وہیں پھینک دیے
ٹرمپ نے کہا کہ داعش کا یہ اہم رہنما اب افریقہ کے عوام کو دہشت زدہ نہیں کر سکے گا اور نہ ہی امریکیوں کو نشانہ بنانے کی منصوبہ بندی میں شامل ہو گا۔ ان کے بقول ابو بلال المنوکی کی ہلاکت کے بعد داعش کے عالمی نیٹ ورک کو بڑا دھچکا پہنچا ہے۔
امریکی صدر نے اس کارروائی میں تعاون پر نائجیریا کی حکومت کا شکریہ بھی ادا کیا اور امریکی افواج کی کارکردگی کو سراہا۔
