ورلڈ ہائپرٹینشن ڈے 2026 کے موقع پر عالمی سطح پر اس سال کا تھیم ’آئیے مل کر بلند فشارِ خون (ہائی بلڈ پریشر) کو کنٹرول کریں‘ رکھا گیا ہے، جس کا مقصد عوام میں اس خاموش مگر خطرناک بیماری کے خلاف آگاہی پیدا کرنا ہے۔
یہ بھی پڑھیں:ہائی بلڈ پریشر خاموشی سے گردوں کو نقصان پہنچا سکتا ہے، نئی تحقیق
ماہرین صحت کے مطابق ہائی بلڈ پریشر ایک ایسا مرض ہے جو اکثر بغیر واضح علامات کے جسم کو متاثر کرتا رہتا ہے اور بروقت تشخیص نہ ہونے کی صورت میں دل، دماغ اور گردوں سمیت اہم اعضا کو شدید نقصان پہنچا سکتا ہے۔ اسی لیے اسے ’خاموش قاتل‘ بھی کہا جاتا ہے۔
طبی ماہرین نے زور دیا ہے کہ ہر فرد کو چاہیے کہ وہ کم از کم سال میں ایک بار اپنا بلڈ پریشر ضرور چیک کروائے، جبکہ مریضوں کو باقاعدہ علاج اور نگرانی کو معمول بنانا چاہیے۔
بلڈ پریشر کی درجہ بندی کے مطابق نارمل لیول 120/80 سے کم ہوتا ہے، جبکہ 120/80 سے 139/89 تک پری ہائپرٹینشن، 140/90 سے 159/99 اسٹیج ون اور 160/100 یا اس سے زیادہ اسٹیج ٹو ہائپرٹینشن شمار کیا جاتا ہے۔ 180/110 سے اوپر کی حالت کو خطرناک ایمرجنسی قرار دیا جاتا ہے۔
یہ بھی پڑھیں:ایپل نے بلڈ پریشر مانیٹرنگ سمیت جدید فیچرز سے لیس واچ الٹرا 3 متعارف کروا دی
ماہرین کے مطابق غیر صحت مند طرزِ زندگی جیسے زیادہ نمک اور چکنائی کا استعمال، تمباکو نوشی، جسمانی سرگرمی کی کمی اور ذہنی دباؤ اس بیماری کے بڑے اسباب ہیں۔ شہریوں کو مشورہ دیا گیا ہے کہ وہ متوازن غذا، باقاعدہ ورزش اور پرسکون طرزِ زندگی اپنائیں۔
ورلڈ ہائپرٹینشن ڈے کا بنیادی مقصد عوام میں شعور اجاگر کرنا، بیماری کی بروقت تشخیص کو فروغ دینا اور صحت مند عادات کو اپنانے کی ترغیب دینا ہے تاکہ اس بیماری کے بڑھتے ہوئے اثرات کو روکا جا سکے۔
ماہرین نے کہا ہے کہ درست تشخیص، باقاعدہ بلڈ پریشر مانیٹرنگ اور صحت مند طرزِ زندگی اپنانا ہی اس بیماری سے بچاؤ اور اس کے کنٹرول کا مؤثر ذریعہ ہے۔
