ہالی ووڈ کے سپر اسٹارز بریڈ پٹ اور انجلینا جولی کی بیٹی زاہرا مارلے جولی نے اپنی گریجویشن تقریب کے دوران والد کا خاندانی نام استعمال نہ کرکے توجہ حاصل کرلی۔
21 سالہ زاہرا نے نفسیات میں بیچلر آف آرٹس کی ڈگری حاصل کی۔ کالج کی 139ویں سالانہ کانووکیشن تقریب 17 مئی کو امریکی شہر اٹلانٹا میں منعقد ہوئی۔
یہ بھی پڑھیں: براڈ پٹ نے انجلینا جولی کے خلاف مقدمہ دائر کردیا، وجہ کیا بنی؟
گریجویشن پروگرام میں ان کا نام ’زاہرا مارلے جولی-پٹ‘ درج تھا، تاہم اسٹیج پر ڈگری وصول کرتے وقت انہیں ’ زاہرا مارلے جولی‘ کے نام سے پکارا گیا، جسے سوشل میڈیا صارفین نے خاصی توجہ دی۔
یہ پہلا موقع نہیں جب زاہرا نے ’پٹ‘ نام ترک کیا ہو۔ اس سے قبل نومبر 2023 میں Alpha Kappa Alpha Sorority میں شمولیت کے دوران بھی انہوں نے اپنا تعارف ’زاہرا مارلے جولی‘ کے نام سے کروایا تھا۔
یہ بھی پڑھیں: کیا انجلینا جولی بڑھاپے سے خفا ہیں؟
اپریل میں Pearls of Purpose Foundation کے ایک خصوصی پروگرام میں خطاب کرتے ہوئے زاہرا نے اپنی والدہ انجلینا جولی کو ’سب سے زیادہ بے غرض، محبت کرنے والی اور سمجھنے والی خاتون‘ قرار دیا تھا۔
انہوں نے کہا تھا کہ ان کی والدہ نے انہیں دوسروں کی مدد کرنے، مہربانی اختیار کرنے اور ایک بہتر انسان بننے کی تربیت دی۔ یاد رہے کہ اس سے قبل بریڈ پٹ اور انجلینا جولی کی بیٹی شیلو نے بھی اپنے نام سے والد کا نام ہٹا دیا تھا۔
واضح رہے کہ انجلینا جولی اور بریڈ پٹ کے چھ بچے ہیں جن میں زاہرا کے علاوہ شائلو، پیکس، میڈکس اور جڑواں بچے ویوین اور ناکس شامل ہیں۔
