واٹس ایپ نے اینڈرائیڈ کے نئے بیٹا ورژن میں چیٹ لسٹس کے انٹرفیس کو تبدیل کرنے پر کام شروع کردیا ہے۔ اس نئی تبدیلی کا بنیادی مقصد صارفین کے لیے مطلوبہ گفتگو کو تلاش کرنا اور ایپلی کیشن کے استعمال کو مزید آسان بنانا ہے۔
اس سے قبل تمام کسٹم لسٹس اسکرین کے اوپری حصے میں ایک ہی قطار میں نظر آتی تھیں جس سے اسکرین پر کافی رش دکھائی دیتا تھا۔ زیادہ لسٹس رکھنے والے صارفین کو مطلوبہ فلٹر تلاش کرنے کے لیے بار بار دائیں بائیں اسکرول کرنا پڑتا تھا جس سے وقت ضائع ہوتا تھا۔
یہ بھی پڑھیں: واٹس ایپ صارفین ہوشیار! رجسٹرڈ اور فعال سم کا استعمال لازمی قرار
نئے نظام کے تحت اب صارفین اپنی مرضی کے مطابق صرف انتہائی اہم لسٹس کو ہی مرکزی اسکرین پر سامنے رکھ سکیں گے، کم استعمال ہونے والی باقی تمام لسٹس کو اب ایک الگ اور مخصوص سیکشن میں منتقل کرنے کی سہولت دے دی گئی ہے۔
صارفین مین سیٹنگز پیج پر جائے بغیر ہی اس مخصوص حصے سے براہ راست اپنی لسٹس کی ترتیب کو تبدیل کرسکتے ہیں۔ اس نئے مینو کی بدولت واٹس ایپ انٹرفیس کو صاف ستھرا اور اپنی مرضی کے مطابق بنانا انتہائی آسان ہوگیا ہے۔
اس اپ ڈیٹ میں ڈیفالٹ فلٹرز پر بھی صارفین کو پہلے سے زیادہ کنٹرول فراہم کرنے کی بہترین کوشش کی گئی ہے۔ مثال کے طور پر ‘فیورٹس’ کا فلٹر پہلے استعمال نہ ہونے کے باوجود اسکرین پر مستقل جگہ گھیرے رکھتا تھا جو اب ختم ہوگیا ہے۔
یہ بھی پڑھیں: میٹا کا حریف اے آئی چیٹ بوٹس کو واٹس ایپ تک مفت رسائی دینے کا اعلان
اب صارفین اگر چاہیں تو اسکرین کو مزید سادہ رکھنے کے لیے فیورٹس کے فلٹر کو بھی وہاں سے مکمل طور پر ہٹا سکتے ہیں۔ یہ کارآمد فیچر فی الحال گوگل پلے بیٹا پروگرام کے ذریعے صرف چند محدود صارفین کے لیے ٹیسٹنگ کے لیے پیش کیا گیا ہے۔
واٹس ایپ انتظامیہ آنے والے چند ہفتوں کے دوران اس فیچر کی کارکردگی کو مانیٹر کرتے ہوئے اسے مرحلہ وار تمام صارفین کے لیے جاری کردے گی۔
