جیکب آباد میں پسند کی شادی کے تنازع پر گھروں کو آگ لگانے کے واقعے کے حوالے سے متاثرہ گھرانوں کا سروے مکمل کر لیا گیا ہے۔
ڈپٹی کمشنر شہزاد احمد ساہی نے میڈیا سے گفتگو کرتے ہوئے کہاکہ آتشزدگی کے واقعے میں مجموعی طور پر 121 گھر متاثر ہوئے ہیں۔
انہوں نے کہا کہ متاثرہ خاندانوں کو خیمے، مچھردانیاں، چارپائیاں اور دیگر ضروری سامان فراہم کیا جا رہا ہے، جبکہ متاثرین کی بحالی تک انہیں راشن بھی جاری رکھا جائے گا۔
ڈپٹی کمشنر کے مطابق متاثرہ افراد کے لیے معاوضے کی فراہمی کی غرض سے سندھ حکومت کو سفارش کی جائے گی۔
ادھر ایس ایس پی نے بتایا کہ گھروں کو جلانے کے واقعے کا مقدمہ درج کر لیا گیا ہے جس میں 32 افراد نامزد ہیں جبکہ 6 ملزمان کو گرفتار کیا جا چکا ہے۔ ان کے مطابق دیگر ملزمان کی گرفتاری کے لیے چھاپے مارے جا رہے ہیں۔
ایس ایس پی نے مزید بتایا کہ 5 مئی کو پسند کی شادی کے تنازع پر لڑکی کے حامیوں کی جانب سے لڑکے کے گاؤں کو آگ لگائی گئی تھی۔
