بنگلہ دیشی کوسٹ گارڈ کے لیے 5 نئے پٹرول جہازوں کی خریداری کا 10 کروڑ ڈالر کا منصوبہ منظور کرلیا گیا ہے۔
حکومت نے ملک کی سمندری اور دریاؤں کی سیکیورٹی کو مضبوط بنانے کے لیے 1212 کروڑ ٹکے کی اس بھاری لاگت کی منظوری دی ہے۔ ڈھاکہ سیکریٹریٹ میں وزیرِ مالیات امیر خسرو محمود چوہدری کی زیرِ صدارت ہونے والے کابینہ کمیٹی کے اجلاس میں یہ اہم فیصلہ کیا گیا۔
یہ بھی پڑھیں: بنگلہ دیش جدید اور مضبوط کوسٹ گارڈ کی تشکیل کے لیے پُرعزم ہے، وزیر داخلہ
سرکاری حکام کے مطابق یہ نئے جہاز کوسٹ گارڈ کے بیڑے کو جدید بنانے کے منصوبے کے تحت خریدے جارہے ہیں جو داخلی آبی گزرگاہوں اور ساحلی علاقوں میں نگرانی کے کام آئیں گے۔
واضح رہے کہ بنگلہ دیشی کوسٹ گارڈ کے پاس اس وقت موجود پٹرولنگ جہاز سال 1970 کے بنے ہوئے ہیں، یعنی وہ اپنی 25 سالہ آپریشنل مدت سے کہیں زیادہ پرانے ہو چکے ہیں، ان پرانے جہازوں کو بدلنے کے لیے نئے جہازوں کی تیاری کا ٹھیکہ دو مقامی کمپنیوں کو مشترکہ طور پر دیا گیا ہے۔
ایک اور الگ فیصلے میں خریداری کمیٹی نے نیشنل ٹیلی کمیونیکیشن مانیٹرنگ سینٹر کے انٹرنیٹ مواد کو بلاک اور فلٹر کرنے والے نظام کو وسعت دینے کے لیے ساڑھے 94 کروڑ ٹکے کے منصوبے کی بھی منظوری دی ہے۔
یہ بھی پڑھیں: سرحد پار اسمگلنگ کے خلاف بارڈر گارڈ بنگلہ دیش متحرک، بڑی کھیپ برآمد
اس منصوبے کے تحت چھ ڈیٹا سینٹرز کے لیے اعلیٰ صلاحیت کے حامل نیکسٹ جنریشن فائر وال سسٹمز اور دیگر معاون آلات خریدے جائیں گے۔ اس اقدام سے بنگلہ دیش کے ڈیجیٹل مانیٹرنگ اور سائبر کنٹرول کے بنیادی ڈھانچے کو مزید مضبوط بنانے میں مدد ملے گی۔
