فتنہ الہندوستان کے دہشتگردوں کی جانب سے خاران شہر اور کیچ کے علاقے بلنگور میں سیکیورٹی فورسز کی گاڑیوں پر حملے سے متعلق کیا جانے والا پروپیگنڈا من گھڑت اور بے بنیاد قرار دے دیا گیا۔
ذرائع کے مطابق فتنہ الہندوستان کے دہشتگردوں کی جانب سے خاران اور بلنگور میں سیکیورٹی فورسز کی گاڑیوں پر حملے کی افواہیں جھوٹ پر مبنی ہیں، جن کا حقیقت سے کوئی تعلق نہیں۔
ذرائع کا کہنا ہے کہ ایسی افواہوں کا مقصد صرف اپنے بیرونی آقاؤں کو خوش کرنا اور عوام میں خوف و ہراس پھیلانا ہے۔
واضح رہے کہ سیکیورٹی فورسز فتنہ الہندوستان کے دہشتگردوں کے خلاف کارروائیاں جاری رکھے ہوئے ہیں۔
کچھ روز قبل سیکیورٹی فورسز نے بلوچستان کے علاقے منگلہ زرغون غر میں آپریشن کے دوران 35 سے زیادہ دہشتگردوں کو ہلاک کردیا تھا، جبکہ 3 اہم کمانڈرز گرفتار کرلیے تھے۔
وزیراعلیٰ بلوچستان کے معاون برائے سیاسی و میڈیا امور شاہد رند نے اس حوالے سے تفصیلات بتاتے ہوئے کہا تھا کہ منگلہ زرغون غر میں 13 مئی سے جاری انٹیلیجنس بیسڈ آپریشن میں فتنہ الہندوستان کے 35 سے زیادہ دہشتگرد ہلاک ہوئے۔
اپنے ایک بیان میں انہوں نے کہاکہ دہشتگردوں کے متعدد کیمپس اور ٹھکانے تباہ ہوئے، اور فورسز کو اہم کامیابیاں حاصل ہوئی ہیں۔
انہوں نے بتایا کہ کارروائی کے دوران فتنہ الہندوستان کے 3 اہم کمانڈرز گرفتار کرلیے گئے ہیں۔
شاہد رند کے مطابق گرفتار دہشتگرد کمانڈرز سے اہم معلومات حاصل ہوئی ہیں، اور مزید کارروائیاں جاری ہیں۔
انہوں نے کہاکہ دہشتگردوں کے سہولت کاروں اور پشت پناہ عناصر کے گرد گھیرا تنگ کیا جا رہا ہے، ریاست پاکستان دہشتگردی کے مکمل خاتمے تک اپنی کارروائیاں جاری رکھے گی۔
انہوں نے کہاکہ یہ آپریشن بلوچستان اور پاکستان کے امن و استحکام کے لیے ناگزیر ہے۔
