روسی صدر ولادیمیر پیوٹن کے دورہِ بیجنگ کے دوران صدر شی جن پنگ نے ان کا شاندار سرکاری استقبال کیا، جہاں دونوں رہنماؤں نے امریکی صدر ڈونلڈ ٹرمپ کے مجوزہ ’گولڈن ڈوم‘ میزائل ڈیفنس سسٹم پر سخت تنقید کی ہے۔
روس اور چین نے ایک مشترکہ بیان میں خبردار کیا ہے کہ امریکا کا یہ نیا دفاعی منصوبہ نہ صرف عالمی اسٹریٹجک استحکام کو تباہ کر دے گا بلکہ اس سے دنیا بھر میں شدید اقتصادی بحران بھی پیدا ہو سکتا ہے۔
یہ بھی پڑھیں: صدر ٹرمپ کا ’گولڈن ڈوم‘ منصوبہ حتمی منصوبہ بندی کے مرحلے میں داخل
روسی صدر کا یہ دورہ امریکی صدر ٹرمپ کے تین روزہ دورہِ چین کے فوراً بعد ہوا ہے، جو کسی بڑی کامیابی کے بغیر ختم ہو گیا تھا۔
رپورٹس کے مطابق امریکا کا یہ ’گولڈن ڈوم‘ منصوبہ ایک ایسا کثیر الجہتی میزائل دفاعی نیٹ ورک ہے جو خلا میں موجود ہتھیاروں کے ذریعے کسی بھی میزائل کو پرواز کے دوران ہی تباہ کرنے کی صلاحیت رکھتا ہے۔
ماسکو اور بیجنگ کا موقف ہے کہ یہ منصوبہ حملہ آور اور دفاعی جوہری صلاحیتوں کے مابین موجود توازن کو مکمل طور پر ختم کردے گا، جو کہ عالمی امن کے لیے انتہائی ضروری ہے۔
دونوں ممالک نے واشنگٹن پر اس بات کے لیے بھی تنقید کی کہ اس نے سال 2010 کے ’نیو اسٹارٹ‘ معاہدے کی مدت ختم ہونے دی اور کسی متبادل معاہدے کے لیے مذاکرات نہیں کیے۔
یہ بھی پڑھیں: چین، روس، شمالی کوریا اور ایران مل کر کام کررہے ہیں، نیٹو چیف
اس موقع پر روس نے چین کے اس فیصلے کی کھل کر حمایت کی ہے جس کے تحت بیجنگ نے امریکا اور روس کے مابین ہونے والے ممکنہ اسلحہ کنٹرول مذاکرات میں شامل ہونے سے انکار کردیا تھا۔ دونوں ممالک نے درمیانے فاصلے تک مار کرنے والے میزائلوں کی تنصیب اور امریکا کی ’پہلے حملے‘ کی حکمتِ عملی کے خلاف بھی سخت انتباہ جاری کیا ہے۔
عالمی سطح پر بڑھتے ہوئے اس تناؤ کے درمیان روس نے بیلاروس کے ساتھ مشترکہ فوجی مشقوں کی ویڈیوز بھی جاری کی ہیں، جس میں اسکندر ایم میزائل سسٹم کے ذریعے جوہری وارہیڈز کی مشقیں دکھائی گئی ہیں۔
