وزیراعلیٰ پنجاب مریم نواز شریف نے پاکستان اور چین کے درمیان سفارتی تعلقات کی 75 ویں سالگرہ کے تاریخی موقع پر دونوں ممالک کی قیادت اور عوام کو دلی مبارکباد پیش کی ہے اور کہا ہے کہ پاک چین دوستی سمندروں سے گہری، ہمالیہ سے بلند اور اسٹیل سے زیادہ مضبوط ہے۔
مریم نواز نے چینی صدر شی جن پنگ، کمیونسٹ پارٹی آف چائنا اور چینی عوام کے لیے نیک خواہشات کا اظہار کرتے ہوئے دونوں ممالک کی لازوال دوستی، پائیدار امن اور باہمی تعاون کو زبردست خراجِ تحسین پیش کیا ہے۔
یہ بھی پڑھیں: پاک چین دوستی کا جشن، پاکستانی قیادت کا سی پیک اور اسٹریٹجک شراکت داری کو مزید وسعت دینے پر زور
اپنے خصوصی پیغام میں وزیراعلیٰ مریم نواز شریف نے کہا پاک چین سفارتی تعلقات کے 75 سال کی بے مثال تکمیل ایک تاریخ ساز سنگ میل ہے۔ ہماری یہ دوستی باہمی اعتماد، احترام اور مشترکہ ترقی کی وہ لازوال مثال ہے جس نے وقت کے ہر امتحان کو پاس کیا ہے۔ چین نے ہر مشکل گھڑی میں پاکستان کے ساتھ کھڑے ہوکر ہمیشہ حقِ دوستی ادا کیا ہے۔
وزیر اعلیٰ مریم نواز کی ہمالیہ سے بلند ، سمندر سے گہری دوستی کی 75 ویں سالگرہ۔ دونوں ممالک کی قیادت م، عوام كومباركباد۔
🇵🇰🇨🇳مریم نواز کا چینی صدرشی جن پنگ، کمیونسٹ پارٹی آف چائنا اور عوام کیلئے نیک خواہشات کا اظہار! pic.twitter.com/IdY4BtpZ5C
— PMLN (@pmln_org) May 21, 2026
وزیراعلیٰ پنجاب نے پاکستان اور چین کے درمیان قابلِ اعتماد اسٹرٹیجک تعاون پر مبنی شراکت داری کو مزید مستحکم کرنے کے غیر متزلزل عزم کا اعادہ کیا۔ انہوں نے اس بات پر زور دیا کہ امن، خوشحالی اور علاقائی استحکام کے معاملات پر دونوں ممالک کا مؤقف ہمیشہ یکساں رہا ہے، اور یہ پائیدار دوستی نسلوں تک قائم و دائم رہے گی۔
یہ بھی پڑھیں: وزیراعظم شہباز شریف سے چینی وفد کی ملاقات، پاک چین دوستی کو مضبوط بنانے کے عزم کا اعادہ
معاشی تعاون پر گفتگو کرتے ہوئے مریم نواز شریف کا کہنا تھا کہ پاک چین اقتصادی راہداری (سی پیک) دونوں ممالک کے عوام کی خوشحالی اور روشن مستقبل کی نوید ہے۔ یہ منصوبہ دونوں برادر ممالک کے درمیان معاشی تعاون اور پائیدار ترقی کا منہ بولتا ثبوت ہے۔
انہوں نے اپنے پیغام کا اختتام روایتی جوش و جذبے کے ساتھ ’پاک چین دوستی زندہ باد‘ کے نعرے سے کرتے ہوئے کہا کہ یہ رشتہ سمندروں سے گہرا، ہمالیہ سے بلند اور اسٹیل سے زیادہ مضبوط ہے۔
