وزیرِ اعظم شہباز شریف نے وزیرِ اعظم ہاؤس میں پرنس رحیم آغا خان کے اعزاز میں ناشتے کا اہتمام کیا، اس موقع پر ملاقات کے دوران وزیرِ اعظم نے آغا خان ڈویلپمنٹ نیٹ ورک پر زور دیا کہ وہ پاکستان کے ساتھ شراکت داری کو مزید وسعت دے۔
وزیرِ اعظم نے نے خاص طور پر گلگت بلتستان اور چترال کے علاقوں میں نیٹ ورک کے کاموں کو بڑھانے کی خواہش کا اظہار کیا، پرنس رحیم کا پاکستان کے پہلے سرکاری دورے پر پرتپاک استقبال کیا اور امن و استحکام کے لیے ان کی کوششوں کو سراہا۔
یہ بھی پڑھیں: پرنس کریم آغا خان کے انتقال کے بعد پرنس رحیم الحسینی جانشین نامزد
انہوں نے آغا خان نیٹ ورک کی جانب سے دیہی ترقی، صحت، تعلیم اور ماحولیاتی تبدیلیوں کے حوالے سے کی جانے والی خدمات کی تعریف کی اور آغا خان یونیورسٹی کے شعبہ صحت اور اعلیٰ تعلیم میں کردار کو بھی خصوصی طور پر سراہا۔
Prime Minister Muhammad Shehbaz Sharif addresses the breakfast hosted in the honor of Prince Rahim Agha Khan at Prime Minister's House, Islamabad. 21 May 2026. pic.twitter.com/RoTDkIVMT2
— Prime Minister's Office (@PakPMO) May 21, 2026
ملاقات میں شمالی علاقہ جات میں ماحولیاتی لچک کو مضبوط بنانے کے لیے نیٹ ورک کو ایک قابلِ اعتماد شراکت دار قرار دیا گیا۔
اس موقع پر وزیرِ اعظم نے ایران اور امریکا کے مابین ہونے والے اسلام آباد مذاکرات کے لیے سرینا ہوٹل کی فراہمی پر پرنس رحیم کا شکریہ ادا کیا، انہوں نے پرنس رحیم کے والد پرنس کریم آغا خان چہارم کے انتقال پر گہرے دکھ اور تعزیت کا اظہار بھی کیا۔
یہ بھی پڑھیں: صدر آصف علی زرداری کی پرنس رحیم الحسینی سے ملاقات، پرنس کریم آغا خان کے انتقال پر اظہار تعزیت
اس موقع پر پرنس کریم آغا خان چہارم کی پاکستان کے لیے 7 دہائیوں پر محیط خدمات کے اعتراف میں یادگاری ڈاک ٹکٹ بھی پیش کیا گیا, پرنس رحیم نے پرتپاک استقبال پر وزیرِ اعظم کا شکریہ ادا کیا اور انسانی ترقی کے منصوبوں میں تعاون جاری رکھنے کے عزم کا اظہار کیا۔
واضح رہے کہ ایک روز قبل صدر آصف علی زرداری اور اول خاتون بی بی آصفہ بھٹو زرداری نے نور خان ائربیس پر ان کا استقبال کیا تھا, والد کے انتقال کے بعد اسماعیلی برادری کی قیادت سنبھالنے کے بعد پرنس رحیم کا پاکستان کا یہ پہلا سرکاری دورہ ہے۔
صدر مملکت نے ان کے اعزاز میں ضیافت بھی دی جس میں وزیرِاعظم، فیلڈ مارشل سید عاصم منیر اور دیگر حکام نے شرکت کی۔
