پاکستان کے جنوبی اور وسطی علاقوں میں جہاں ان دنوں شدید ترین ہیٹ ویو کا راج ہے اور درجہ حرارت 44 سے 46 ڈگری سینٹی گریڈ تک جا پہنچا ہے، دوسری جانب سوشل میڈیا پر شمالی علاقوں میں ہونے والی حالیہ برفباری کی ویڈیوز نے صارفین کو حیرت میں ڈال دیا ہے۔
بہت سے لوگ اسے اس موسم میں ایک ’معجزہ‘ اور غیر معمولی واقعہ قرار دے رہے ہیں، جس کے بعد اس صورتحال کا حقائق پر مبنی جائزہ لیا گیا ہے۔
شمالی علاقوں سے سامنے آنے والی ویڈیوز اور رپورٹس بالکل سچی ہیں، گلگت بلتستان، خیبر پختونخوا اور آزاد جموں و کشمیر میں حالیہ مہینوں کے دوران نہ صرف بارشیں ہوئیں بلکہ شدید برفباری بھی ریکارڈ کی گئی ہے۔
Is there snow in Gilgit-Baltistan even in this season?… 😲 https://t.co/jsi2ROm46J
— Turgay Evren (@TurgayEvren1) May 19, 2026
گلگت بلتستان میں خنجراب پاس کے قریب برفانی تودے گرنے سے شاہراہِ قراقرم بلاک ہو گئی، جبکہ اسکردو کے مضافات اور دیوسائی کے میدانوں میں مئی کے مہینے میں بھی 3 انچ تک برفباری دیکھنے کو ملی ہے۔ اسی طرح مانسہرہ اور ایبٹ آباد کے بالائی علاقوں میں بھی اپریل اور مئی کے اوائل میں غیر معمولی برفباری کی تصدیق حکام اور مقامی شہریوں نے کی ہے۔
محکمہ موسمیات نے پہلے ہی مغربی ہواؤں کے سلسلے کے باعث ان بالائی علاقوں میں بارشوں اور برفباری کی پیشگوئی کر رکھی تھی، جس کے ساتھ ہی گلیشیئر پگھلنے کے نتیجے میں آنے والے سیلاب کا الرٹ بھی جاری کیا گیا تھا۔
ماہرین کے مطابق، روایتی طور پر پاکستان کے شمالی علاقوں میں برفباری کا سیزن نومبر کے آخر سے فروری تک رہتا ہے اور جنوری کو سرد ترین مہینہ مانا جاتا ہے۔ تاہم، حالیہ برسوں میں یہ دیکھا گیا ہے کہ برفباری کا یہ سلسلہ مارچ، اپریل اور اب مئی تک طویل ہوتا جارہا ہے۔
خدا کی قدرت ، مئ میں ضلع مانسہرہ جلکھڈ میں برفباری ❤️ pic.twitter.com/yTHrAJTjBe
— CPEC 🇵🇰🇨🇳 (@CPEC_UPDATE) May 18, 2026
ڈبلیو ڈبلیو ایف پاکستان کے ڈائریکٹر حیدر رضا اور دیگر ماحولیاتی ماہرین کا کہنا ہے کہ مارچ کے بعد ان علاقوں میں بارش اور برفباری ہونا کوئی اچھنبے کی بات نہیں ہے، لیکن گذشتہ چند سالوں میں اس کی شدت میں جو غیر معمولی اضافہ ہوا ہے، اس کی اصل وجہ گلوبل وارمنگ اور موسمیاتی تبدیلیاں ہیں۔
عالمی درجہ حرارت میں اضافے کی وجہ سے موسموں کا روایتی چکر شدید متاثر ہورہا ہے، جس کے نتیجے میں کہیں طویل سردی، کہیں بے وقت کی سخت گرمی اور کہیں معمول سے زیادہ بارشیں دیکھنے کو مل رہی ہیں۔
یہ دعویٰ بالکل درست ہے کہ پاکستان کے شمالی علاقوں میں گرمیوں کے آغاز کے باوجود برفباری کا سلسلہ دیکھا گیا ہے۔ یہ کوئی معجزہ یا اکیلا واقعہ نہیں ہے، بلکہ یہ اس موسمیاتی تبدیلی کا واضح ثبوت ہے جو آہستہ آہستہ پاکستان کے پورے ماحولیاتی نظام اور موسموں کے روایتی دورانیے کو اپنے لپیٹ میں لے رہی ہے۔
نوٹ: یہ فیکٹ چیک اصل میں آئی ویریفائی پاکستان کی جانب سے شائع کیا گیا تھا، جو کہ سی ای جے-آئی بی اے اور یو این ڈی پی کا ایک مشترکہ منصوبہ ہے۔
