کولمبیا کی مشہور گلوکارہ شکیرا ایک بار پھر فٹبال ورلڈ کپ کے اسٹیج پر راج کرنے کے لیے تیار ہیں، انہوں نے امسال ہونے والے فیفا ورلڈ کپ 2026 کے آفیشل ترانے ‘ڈائی ڈائی’ کے لیے نائیجیرین اسٹار برنا بوائے کے ساتھ شراکت داری کی ہے۔
یہ بھی پڑھیں: 16 سال بعد واپسی، شکیرا نے 2026 فیفا ورلڈ کپ کے لیے گانا جاری کردیا
شکیرا اور برنا بوائے نے اپنے انسٹاگرام اکاؤنٹس پر اس نئے فٹبال ترانے کی ویڈیو جاری کی، اس گانے کی ویڈیو میں لیونل میسی، کلیان ایمباپے اور ہیری کین سمیت دُنیا کے کئی مایہ ناز فٹبال کھلاڑیوں کو بھی دکھایا گیا ہے، جس پر شکیرا نے ان تمام کھلاڑیوں کا خصوصی شکریہ ادا کیا ہے۔
سوشل میڈیا پر اس گانے کی ویڈیو سامنے آتے ہی فٹبال کے مداحوں میں خوشی کی لہر دوڑ گئی ہے اور وہ اس پر اپنی گہری دلچسپی کا اظہار کررہے ہیں، مداحوں کا کہنا ہے کہ شکیرا نے ایک بار پھر دُنیا بھر کے بچوں، اسٹیڈیمز، بہترین کوریوگرافی اور فٹبال کے رنگوں کو اس خوبصورت ویڈیو میں یکجا کردیا ہے۔
یہ بھی پڑھیں: فٹبال ورلڈ کپ 2026 کا نیا آفیشل گانا جاری، شکیرا کے ’ڈائی ڈائی‘ نے دھوم مچا دی
یہ دُنیائے فٹبال میں دوسرا موقع ہے جب شکیرا کو فیفا ورلڈ کپ کے آفیشل ترانے کی ذمہ داری دی گئی ہے. اس سے قبل 2010 میں جنوبی افریقہ میں ہونے والے ورلڈ کپ کے لیے ان کا گانا ‘واکا واکا’ دُنیا بھر میں بے پناہ مقبول ہوا تھا۔
واضح رہے کہ فیفا ورلڈ کپ 2026 کی میزبانی مشترکہ طور پر کینیڈا، میکسیکو اور امریکا کر رہے ہیں. فٹ بال کا یہ سب سے بڑا میلہ گیارہ جون سے لے کر انیس جولائی دو ہزار چھبیس تک شمالی امریکا میں سجایا جائے گا۔
