وفاقی دارالحکومت کی مارگلہ پہاڑیوں میں پیر کے روز ایف 5 سیکٹر کے قریب آگ بھڑک اٹھی جس کے بعد ضلعی انتظامیہ نے تمام ہائیکنگ ٹریلز عارضی طور پر بند کر دیے۔
یہ بھی پڑھیں: مارگلہ کے جنگل میں شدید آگ قدرتی عمل یا انسانی شرارت؟
اے پی پی کے مطابق آگ نے مارگلہ پہاڑیوں کے 3 مختلف مقامات کو اپنی لپیٹ میں لے لیا جس کے باعث ضلعی انتظامیہ نے بڑے پیمانے پر ریسکیو آپریشن شروع کیا۔
حکام کے مطابق آگ پر قابو پانے کے لیے 65 سے زائد اہلکار، جن میں ریسکیو ورکرز، فائر فائٹنگ اسٹاف اور دیگر متعلقہ افسران شامل تھے، کارروائی میں شریک رہے۔ تیز ہواؤں کے باعث امدادی ٹیموں کو مشکلات کا سامنا کرنا پڑا جبکہ بعض متاثرہ مقامات تک رسائی بھی دشوار رہی۔
آگ کے باعث مارگلہ ہلز کے تمام پیدل راستے عارضی طور پر بند کر دیے گئے ہیں تاکہ کسی بھی ناخوشگوار واقعے سے بچا جا سکے۔
ضلعی انتظامیہ کا کہنا ہے کہ آگ پر بیک وقت 3 مختلف مقامات پر قابو پانے کی کوششیں جاری رہیں جبکہ بدلتی ہواؤں کی سمت نے صورتحال کو مزید پیچیدہ بنا دیا۔
مزید پڑھیے: ٹریل 5: فطرت، تنہائی اور خودکلامی
حکام نے خدشہ ظاہر کیا کہ اگر ہائیکنگ ٹریلز پر نقل و حرکت جاری رہی تو آگ قریبی علاقوں تک پھیلنے کا خطرہ بڑھ سکتا ہے اسی لیے شہریوں سے اپیل کی گئی ہے کہ وہ آپریشن مکمل ہونے تک پہاڑی علاقے کا رخ نہ کریں۔
انتظامیہ کے مطابق متاثرہ علاقوں کی مسلسل نگرانی کی جا رہی ہے اور آگ مکمل طور پر بجھنے کے بعد مزید صورتحال سے آگاہ کیا جائے گا۔
حکام نے واضح کیا کہ اگرچہ مارگلہ ہلز اسلام آباد کے شہریوں کے لیے ایک مقبول تفریحی مقام ہیں تاہم موجودہ ہنگامی صورتحال میں عوامی تحفظ کو اولین ترجیح دی جا رہی ہے۔
مزید پڑھیں: مارگلہ کے سائے میں اسموگ کا راج: کیا ہم نے اپنا ’گرین سٹی‘ کھو دیا؟
12 ہزار 605 ہیکٹرز پر پھیلا مارگلہ ہلز نیشنل پارک گرمیوں کے موسم میں اکثر آتشزدگی کے واقعات کا سامنا کرتا ہے جو حالیہ برسوں میں حکومت اور کیپیٹل ڈیولپمنٹ اتھارٹی کے لیے تشویش کا باعث بنے ہوئے ہیں۔
مارچ میں آگ کے موسم سے قبل شہری انتظامیہ نے اس مسئلے سے نمٹنے کے لیے ایک اہم اجلاس منعقد کیا تھا جس میں حکمتِ عملی ترتیب دی گئی۔
اجلاس میں فیصلہ کیا گیا تھا کہ اسلام آباد وائلڈ لائف مینجمنٹ بورڈ، کیپیٹل ڈیولپمنٹ اتھارٹی اور ضلعی انتظامیہ ایک مشترکہ یونٹ کے طور پر کام کریں گے تاکہ مارگلہ پہاڑیوں میں آتشزدگی کے واقعات کی روک تھام یقینی بنائی جا سکے۔
یہ بھی پڑھیے: مارگلہ ویو پوائنٹ پر عوام کو کون سی سہولیات مہیا کی جائیں گی؟
مزید برآں نگرانی کے نظام کو مؤثر بنانے کے لیے پہاڑی علاقوں میں چیک پوسٹوں کی تعداد بڑھانے کا بھی فیصلہ کیا گیا تھا۔
