اسٹیٹ بینک آف پاکستان نے ٹیکس دہندگان کی سہولت کے لیے 29 اور 30 مئی 2026 کو کمرشل بینکوں کے اوقات کار میں توسیع کی ہدایت جاری کر دی ہے تاکہ سرکاری ڈیوٹیوں اور ٹیکسوں کی ادائیگی بروقت یقینی بنائی جا سکے۔
یہ بھی پڑھیں: اسٹیٹ بینک کا بڑا فیصلہ: ٹیکسز اور ڈیوٹیز کی وصولی کے لیے ہفتہ اور اتوار کو بینک کھولنے کا اعلان
اسٹیٹ بینک کے مطابق فیڈرل بورڈ آف ریونیو کی درخواست پر فیصلہ کیا گیا ہے کہ تمام کمرشل بینکوں کی شاخیں جمعہ 29 مئی 2026 کو شام 5:30 بجے تک کھلی رہیں گی تاکہ ٹیکس دہندگان اوور دی کاؤنٹر سرکاری واجبات اور ٹیکس جمع کرا سکیں۔
اسی طرح ہفتہ 30 مئی 2026 کو کھلنے والی تمام بینک برانچز صبح 9 بجے سے شام 5:30 بجے تک کھلی رہیں گی۔ مزید برآں بینکوں کو ہدایت کی گئی ہے کہ وہ متعلقہ شاخیں اس وقت تک کھلی رکھیں جب تک نیشنل انسٹی ٹیوشنل فسیلیٹیشن ٹیکنالوجیز کی جانب سے سرکاری لین دین کے لیے خصوصی کلیئرنگ کا عمل مکمل نہ ہو جائے۔
مزید پڑھیے: شرح سود میں اضافہ، اسٹیٹ بینک نے نئی مانیٹری پالیسی کا اعلان کردیا
اسٹیٹ بینک نے بینکوں کو یہ بھی یقینی بنانے کی ہدایت کی ہے کہ ان کے آن لائن ادائیگی کے تمام ذرائع جن میں انٹرنیٹ بینکنگ، موبائل ایپلی کیشنز، اے ٹی ایمز اور دیگر ڈیجیٹل پلیٹ فارمز شامل ہیں بلا تعطل فعال رہیں تاکہ ٹیکس دہندگان آسانی سے آن لائن ادائیگیاں کر سکیں۔
