پاکستان کرکٹ ٹیم کے سابق کپتان اور لیجنڈری فاسٹ بولر وسیم اکرم حج کی ادائیگی کے دوران اپنے منفرد انداز کی وجہ سے سوشل میڈیا پر توجہ کا مرکز بن گئے۔ رمی جمرات کے موقع پر ان کی مشہور باؤلنگ ایکشن کی ویڈیو تیزی سے وائرل ہو رہی ہے۔
یہ بھی پڑھیں:حج کے دوران عرفات اور مزدلفہ کے لمحات نے متاثر کیا، روبن کوئزون
سابق پاکستانی فاسٹ بولر وسیم اکرم ان دنوں سعودی عرب میں حج ادا کر رہے ہیں۔ رمی جمرات کے دوران انہوں نے شیطان کو کنکریاں مارتے وقت اپنے روایتی فاسٹ باؤلنگ ایکشن کا انداز اپنایا، جس کی ویڈیو سوشل میڈیا پر وائرل ہو گئی۔
ویڈیو میں دیکھا جا سکتا ہے کہ وسیم اکرم نے کنکری پھینکتے وقت اپنے مشہور لیفٹ آرم باؤلنگ انداز کی جھلک دکھائی، جس پر کرکٹ شائقین نے دلچسپ تبصرے کیے۔ بعض صارفین نے مزاحیہ انداز میں کہا کہ ’سلطان آف سوئنگ نے شیطان کو بھی کلین بولڈ کر دیا‘۔
Hajj is something every muslim should experience, for me being present between millions under the open sky was a humbling & profound reminder that we all are equal in the eyes of Almighty… 🌙🤲🏻 pic.twitter.com/Nb0hFtuXB4
— Wasim Akram (@wasimakramlive) May 27, 2026
رپورٹس کے مطابق وسیم اکرم اس سال حج کی ادائیگی کے لیے دیگر پاکستانی شخصیات کے ساتھ سعودی عرب پہنچے ہیں۔ ان کی ویڈیو سامنے آنے کے بعد مداحوں کی بڑی تعداد نے اسے سوشل میڈیا پر شیئر کیا اور کرکٹ کے سنہرے دور کو یاد کیا۔
واضح رہے کہ رمی جمرات حج کا اہم رکن ہے، جس میں عازمین مخصوص مقامات پر کنکریاں مارتے ہیں۔ دنیا بھر سے لاکھوں مسلمان ہر سال اس مذہبی فریضے کی ادائیگی کے لیے سعودی عرب کا رخ کرتے ہیں۔
