نیویارک اسٹیٹ اسمبلی کے مسلم رکن زہران ممدانی نے اسکاٹ ہولینڈ پارک میں منعقدہ افریقن کمیونٹی کی سالانہ ثقافتی تقریب میں خصوصی شرکت کر کے برادری کے ساتھ یکجہتی کا اظہار کیا ہے۔
اس رنگارنگ تقریب میں افریقی نژاد امریکی شہریوں کی بڑی تعداد موجود تھی جہاں روایتی موسیقی، رقص اور کھانوں کے ذریعے افریقی ثقافت کے مختلف رنگوں کو خوبصورت انداز میں اجاگر کیا گیا۔
یہ بھی پڑھیں: بطور میئر نیویارک ابتدائی 100 دن میں کیا کیا؟ ظہران ممدانی نے اپنی کارکردگی بتا دی
زہران ممدانی نے اس موقع پر کمیونٹی کے رہنماؤں سے ملاقاتیں کیں اور نیویارک کی ترقی اور کثیر الثقافتی ماحول کو برقرار رکھنے میں افریقی برادری کے متحرک کردار کو شاندار الفاظ میں سراہا۔
دوسری جانب زہران ممدانی نے اسی روز شہر میں نکالی جانے والی اسرائیل نواز یکجہتی ریلی ’سیلیبریٹ اسرائیل پریڈ‘ میں شرکت کرنے سے مکمل طور پر گریز کیا۔
نیویارک کی مین ہٹن اسٹریٹ پر منعقد ہونے والی اس سالانہ پریڈ میں کئی اہم امریکی سیاستدانوں اور حکام نے شرکت کی، تاہم مسلم اسمبلی ممبر نے فلسطینیوں پر جاری مظالم کے خلاف اپنے دیرینہ اصولی موقف کے باعث اس سے دوری اختیار کرنا مناسب سمجھا۔
یہ بھی پڑھیں: ظہران ممدانی کی نیو یارک میں اسٹیٹ ٹیکس میں بڑی کمی کی تجویز
ان کے اس فیصلے کو نیویارک کی مسلم اور انسانی حقوق کے لیے کام کرنے والی دیگر تنظیموں کی جانب سے مثبت انداز میں دیکھا جارہا ہے۔
مبصرین کا کہنا ہے کہ زہران ممدانی کا اسرائیل نواز پریڈ میں نہ جانا اور اسی وقت پسماندہ کمیونٹیز کی تقریبات کا حصہ بننا ان کی ترقی پسند اور حقوق پر مبنی سیاست کا عکاس ہے۔ وہ ماضی میں بھی کھلم کھلا غزہ میں فوری جنگ بندی اور فلسطینیوں کے حقوق کے حق میں امریکی ایوانوں اور سڑکوں پر آواز بلند کرتے رہے ہیں۔
واضح رہے کہ نیویارک میں مقیم مختلف تارکینِ وطن کی برادریوں میں زہران ممدانی کو ان کے عوامی روابط اور مظلوم طبقات کی کھل کر حمایت کرنے کی وجہ سے انتہائی مقبولیت حاصل ہے۔
