پنجاب اسمبلی میں عیدالاضحیٰ کے موقع پر صوبے بھر میں کامیاب صفائی آپریشن پر وزیراعلیٰ پنجاب مریم نواز شریف کو خراجِ تحسین پیش کرنے کی قرارداد جمع کروا دی گئی۔
یہ قرارداد مسلم لیگ (ن) کی رکن حنا پرویز بٹ کی جانب سے جمع کروائی گئی، جس میں مؤقف اختیار کیا گیا ہے کہ پنجاب بھر میں عیدالاضحیٰ کے دوران صفائی کے مثالی انتظامات کیے گئے۔
مزید پڑھیں:وزیراعلیٰ پنجاب مریم نواز شریف کا ثقافتی تنوع برائے مکالمہ و ترقی کے عالمی دن پر خصوصی پیغام
قرارداد کے متن کے مطابق ایوان وزیراعلیٰ مریم نواز شریف کی قیادت میں صفائی کے مؤثر اور مربوط آپریشن کو سراہتا ہے اور اسے بہترین انتظامی حکمتِ عملی کا مظہر قرار دیتا ہے۔
متن میں کہا گیا ہے کہ ستھرا پنجاب پروگرام کے تحت تمام ورکرز نے بھرپور محنت، ذمہ داری اور لگن کے ساتھ فرائض انجام دیے، جبکہ صوبے کے تمام شہروں اور دیہات میں بلا تفریق صفائی کے انتظامات یقینی بنائے گئے۔
قرارداد میں وزیر بلدیات ذیشان رفیق کی کارکردگی کو بھی سراہا گیا اور کہا گیا ہے کہ سڑکوں، گلیوں اور محلوں کی صفائی کے لیے خصوصی اقدامات کیے گئے۔
مزید کہا گیا ہے کہ عید کے دوران عرقِ گلاب اور فینائل کے استعمال سے ماحول کو صاف ستھرا اور خوشگوار بنایا گیا، جس کے باعث شہریوں کو نمایاں سہولت حاصل ہوئی۔
مزید پڑھیں:وزیراعلیٰ پنجاب مریم نواز شریف سے ارکانِ اسمبلی کی ملاقات، ترقیاتی منصوبوں پر اطمینان کا اظہار
ایوان نے ستھرا پنجاب ٹیم کی کارکردگی کو قابلِ تحسین قرار دیتے ہوئے کہا ہے کہ یہ اقدام وزیراعلیٰ مریم نواز شریف کے ’صاف ستھرا پنجاب‘ وژن کی عملی تصویر ہے، جس سے عوام دوست طرزِ حکمرانی کی عکاسی ہوتی ہے۔
