اسلام آباد پولیس نے انسپکٹر جنرل اسلام آباد پولیس سید علی ناصر رضوی کے پبلک سنٹرک پولیسنگ وژن کے تحت پولیس سمر کیمپ 2026 کا باقاعدہ آغاز کر دیا ہے۔
ترجمان کے مطابق اسلام آباد پولیس لائنز میں منعقدہ افتتاحی تقریب میں اے آئی جی لاجسٹکس عبد الحق عمرانی نے سمر کیمپ 2026 کا افتتاح کیا۔
کمیونٹی پولیسنگ کے فروغ کے لیے سالانہ سمر کیمپ
ترجمان کے مطابق کمیونٹی پولیسنگ کے فروغ اور بچوں کی مثبت تربیت کے لیے ہر سال سمر کیمپ کا انعقاد کیا جاتا ہے، جہاں بچوں کو کھیلوں، نظم و ضبط اور سماجی ذمہ داریوں کی عملی تربیت فراہم کی جاتی ہے۔
مختلف کھیلوں اور تربیتی سرگرمیوں کا اہتمام
سمر کیمپ میں فٹ بال اور گالف کی تربیت کے لیے پروفیشنل کوچز کی خدمات حاصل کی گئی ہیں، جبکہ بچوں کو تیراکی، گھڑ سواری، مارشل آرٹس، جمناسٹکس اور تیر اندازی کی تربیت بھی فراہم کی جا رہی ہے۔
سیفٹی، فرسٹ ایڈ اور ٹریفک قوانین سے آگاہی
آئی جی اسلام آباد سید علی ناصر رضوی نے کہاکہ سمر کیمپ میں بچوں کو ذاتی حفاظت اور سیکیورٹی، ابتدائی طبی امداد اور ٹریفک قوانین سے بھی آگاہ کیا جاتا ہے تاکہ وہ ذمہ دار شہری کے طور پر اپنی صلاحیتوں کو بروئے کار لا سکیں۔
انہوں نے کہاکہ اسلام آباد پولیس کا سمر کیمپ بچوں کی ذہنی و جسمانی نشوونما کے لیے ایک منفرد پلیٹ فارم بن چکا ہے۔
سید علی ناصر رضوی نے کہاکہ شہریوں کے اعتماد کی بدولت 2002 سے پولیس سمر کیمپ ہر سال کامیابی سے منعقد کیا جا رہا ہے اور اس میں بچوں کی بھرپور دلچسپی دیکھنے میں آتی ہے۔
انہوں نے بتایا کہ 4 سے 12 سال عمر کے بچے سمر کیمپ میں جوش و خروش کے ساتھ حصہ لے رہے ہیں۔
پولیس اور عوام کے درمیان اعتماد کا مضبوط ذریعہ
آئی جی اسلام آباد نے کہاکہ سمر کیمپ پولیس اور عوام کے درمیان اعتماد کے رشتے کو مضبوط بنانے میں اہم کردار ادا کر رہا ہے اور بچوں کے لیے محفوظ، مثبت اور صحت مند سرگرمیوں کے فروغ کے سلسلے میں اسلام آباد پولیس کا ایک مثالی اقدام ہے۔
انہوں نے کہا کہ بچے ہمارا مستقبل ہیں اور ان کی بہترین تربیت ہی روشن پاکستان کی ضمانت ہے۔
