سعودی عرب کے نمایاں ماحول دوست سیاحتی منصوبے ’العُرومہ سیزن‘ کا پانچواں ایڈیشن کامیابی سے اختتام پذیر ہوگیا، جس میں گزشتہ 6 ماہ کے دوران 8 لاکھ سے زائد مقامی اور غیر ملکی سیاحوں نے شرکت کی۔ اس کامیابی کو مملکت میں قدرتی مناظر اور ماحول دوست سیاحت کے بڑھتے ہوئے رجحان کا اہم مظہر قرار دیا جا رہا ہے۔
امام عبدالعزیز بن محمد رائل ریزرو ڈویلپمنٹ اتھارٹی کے مطابق العُرومہ سیزن کا انعقاد امام عبدالعزیز بن محمد رائل ریزرو اور کنگ خالد رائل ریزرو میں کیا گیا، جہاں سیاحوں کو قدرتی ماحول، جنگلی حیات اور ثقافتی ورثے سے روشناس کرانے کے لیے مختلف سرگرمیوں کا اہتمام کیا گیا۔
مزید پڑھیں: سعودی عرب : جزائر فرسان میں سیاحتی سرگرمیاں عروج پر، مینگروو جنگلات سیاحوں کی توجہ کا مرکز بن گئے
اتھارٹی کے مطابق امسال 14 سیاحتی خدمات فراہم کرنے والے اداروں نے حصہ لیا اور سیاحوں کے لیے 14 مختلف سرگرمیاں متعارف کرائیں، جن میں پیدل سیاحت، سائیکلنگ، گھڑ سواری، اونٹوں پر صحرائی سفر، ستاروں کا مشاہدہ اور رہنمائی کے ساتھ قدرتی مقامات کی سیر شامل تھیں۔ منصوبے کے نتیجے میں قریباً 84 روزگار کے مواقع بھی پیدا ہوئے اور مقامی آبادی کو معاشی فوائد حاصل ہوئے۔
اونٹوں اور گھوڑوں پر سیر اس سال کی سب سے مقبول سرگرمیوں میں شامل رہی، جبکہ قدرتی مناظر اور جنگلی حیات کے مشاہدے نے بھی سیاحوں کی بڑی تعداد کو اپنی جانب متوجہ کیا۔
اعداد و شمار کے مطابق 5 برس قبل آغاز سے اب تک العُرومہ سیزن میں شرکت کرنے والوں کی مجموعی تعداد قریباً 20 لاکھ تک پہنچ چکی ہے۔ منصوبے کے پہلے ایڈیشن میں صرف 52 ہزار افراد شریک ہوئے تھے، تاہم بعد کے برسوں میں یہ تعداد مسلسل بڑھتی رہی اور پانچویں ایڈیشن میں 8 لاکھ کی حد عبور کر گئی۔
العُرومہ سیزن کا نام ریاض کے مشرق میں واقع قریباً 700 کلومیٹر طویل العُرومہ پہاڑی سلسلے کے نام پر رکھا گیا ہے۔ یہ منصوبہ روایتی شہری تفریحی میلوں سے مختلف ہے اور اس کا مقصد سیاحوں کو سعودی عرب کے قدرتی حسن، حیاتیاتی تنوع اور ثقافتی ورثے سے جوڑنا ہے۔
یہ سرگرمیاں موسمِ خزاں، سرما اور بہار کے معتدل مہینوں میں منعقد کی جاتی ہیں، جس سے قدرتی مقامات کی سیر اور بیرونی سرگرمیوں میں دلچسپی رکھنے والے افراد کو سازگار ماحول میسر آتا ہے۔
مزید پڑھیں: سعودی عرب سے پاکستانیوں کے لیے اس سال قربانی کے کتنے جانوروں کا گوشت آئے گا؟
سعودی حکام کے مطابق العُرومہ سیزن سعودی وژن 2030 کے اہداف کے مطابق معیشت میں تنوع، سیاحت کے فروغ اور ماحولیاتی تحفظ کی کوششوں کا حصہ ہے۔ حکام نے اعلان کیا ہے کہ اس منصوبے کا چھٹا ایڈیشن آئندہ نومبر میں منعقد کیا جائے گا، جس میں پائیدار ترقی، مقامی آبادی کی شمولیت اور قدرتی و ثقافتی ورثے کے مزید مؤثر تعارف پر خصوصی توجہ دی جائے گی۔
تجزیہ کاروں کے مطابق العُرومہ سیزن سعودی عرب کی اُس نئی شناخت کو اجاگر کر رہا ہے جو شہری مراکز سے ہٹ کر قدرتی مناظر، جنگلی حیات کے تحفظ اور ذمہ دارانہ سیاحت کے فروغ پر مبنی ہے۔
