بھارتی شہر موہالی میں پیش آنے والے افسوسناک واقعے میں 30 سالہ خاتون کو مبینہ طور پر اس کے سابق بوائے فرینڈ نے چاقو کے وار کر کے قتل کر دیا جبکہ ملزم نے واقعے کے بعد خود کو بھی زخمی کر کے خودکشی کی کوشش کی۔
پولیس کے مطابق جاں بحق ہونے والی خاتون ڈمپل ضلع پٹیالہ کی رہائشی تھیں اور ایک پرائیویٹ پکنگ اینڈ موونگ کمپنی میں ملازمت کرتی تھیں جہاں ملزم ہروِندر مان عرف ہیری بھی ان کے ساتھ کام کرتا تھا۔ دونوں گزشتہ تقریباً تین سال سے اسی ادارے سے وابستہ تھے۔
https://Twitter.com/thetatvaindia/status/2062758814408147316?s=20
ابتدائی تفتیش میں یہ بات سامنے آئی ہے کہ دونوں کے درمیان ماضی میں قریبی تعلقات رہے تھے تاہم تقریباً چھ ماہ قبل ان کے درمیان علیحدگی ہو گئی تھی۔ پولیس ذرائع کے مطابق ملزم دوبارہ تعلق قائم کرنے کی کوشش کر رہا تھا جبکہ خاتون نے خود کو اس تعلق سے دور کر لیا تھا۔
جمعرات کی شام ڈمپل دفتر میں کام میں مصروف تھیں کہ اسی دوران ہروِندر وہاں پہنچ گیا۔ دونوں کے درمیان تلخ کلامی ہوئی جو بعد ازاں شدید جھگڑے میں تبدیل ہو گئی۔ اس دوران ملزم نے مبینہ طور پر چاقو سے حملہ کرتے ہوئے خاتون کو متعدد وار کر کے شدید زخمی کر دیا جس سے دفتر میں موجود افراد میں خوف و ہراس پھیل گیا۔
یہ بھی پڑھیں: انسانیت سوز واقعہ، شادی سے انکار پر خاتون کے ڈیڑھ سالہ بیٹے کا لرزہ خیر قتل
واقعے کے بعد ملزم نے مبینہ طور پر خود کو بھی چاقو مار کر زخمی کر لیا۔ اطلاع ملنے پر پولیس فوری طور پر موقع پر پہنچی اور دونوں کو قریبی نجی اسپتال منتقل کیا گیا۔
ڈاکٹروں نے خاتون کو اسپتال پہنچنے پر مردہ قرار دے دیا جبکہ ملزم کی حالت تشویشناک بتائی جا رہی ہے اور وہ زیر علاج ہے۔
پولیس نے جائے وقوعہ سے شواہد اکٹھے کر لیے ہیں اور قتل کا مقدمہ درج کر کے مزید تفتیش شروع کر دی ہے۔ حکام کے مطابق واقعے کی اصل وجوہات اور مکمل حقائق ملزم کے بیان کے بعد واضح ہوں گے جو اس کی صحت بہتر ہونے پر ریکارڈ کیا جائے گا۔
