یونس خان اور محمد حفیظ کو پی سی بی میں اہم عہدے ملنے کا امکان، شان مسعود کو ٹیسٹ کپتانی سے ہٹانے کا فیصلہ

پاکستان کرکٹ بورڈ (پی سی بی) کی جانب سے قومی کرکٹ ٹیم کے تنظیمی ڈھانچے اور کارکردگی کو بہتر بنانے کے لیے سابق کپتانوں کو اہم اور بڑی ذمہ داریاں دیے جانے کا قوی امکان ہے۔

یہ بھی پڑھیں: پی سی بی کا او ٹی ٹی پلیٹ فارم متحرک، قومی کرکٹرز کی خصوصی ویڈیوز جاری

میڈیا رپورٹس کے مطابق ماضی کے مایہ ناز بلے باز اور سابق کپتان یونس خان کو پاکستان کی قومی ٹیسٹ ٹیم کا نیا ہیڈ کوچ مقرر کیے جانے پر غور کیا جارہا ہے، اور اس کے ساتھ ہی انہیں قومی سلیکشن کمیٹی کا باقاعدہ حصہ بھی بنایا جا سکتا ہے تاکہ وہ ٹیم کی طویل فارمیٹ کی حکمتِ عملی میں براہِ راست کردار ادا کر سکیں۔

مزید برآں، سابق کپتان محمد حفیظ کو پی سی بی کا ڈائریکٹر کرکٹ انٹرنیشنل کی اہم ترین ذمہ داری دیے جانے کا امکان ہے، جبکہ ان کی مہارت کو دیکھتے ہوئے انہیں بھی قومی سلیکشن کمیٹی میں شامل کیا جاسکتا ہے۔

یہ بھی پڑھیں: یونس خان افغانستان کی کرکٹ ٹیم کے مینٹور مقرر

رپورٹس کے مطابق کرکٹ بورڈ نے قومی ٹیسٹ ٹیم کی قیادت اور کوچنگ کے شعبے میں بڑے فیصلے کر لیے ہیں، جس کے تحت موجودہ ٹیسٹ کپتان شان مسعود اور موجودہ کوچ سرفراز احمد کو ان کے عہدوں سے ہٹائے جانے کا امکان ہے۔

 سابق کپتان سرفراز احمد کو مکمل طور پر فارغ نہیں کیا جا رہا، بلکہ وہ پاکستان شاہینز ٹیم کے ساتھ کوچنگ کی اپنی موجودہ ذمہ داریاں بدستور جاری رکھیں گے۔