منشیات فروشی کے الزام میں گرفتار انمول عرف پنکی کے خلاف کراچی کے علاقے بغدادی تھانے میں درج قتل کے مقدمے میں اہم پیش رفت سامنے آئی ہے، جہاں تفتیشی افسر نے کیس کا عبوری چالان پراسیکیوشن کے پاس جمع کرا دیا ہے۔
عبوری چالان کے مطابق 7 مئی کو مقدمے کا مدعی موٹر سائیکل سے متعلق کام کے سلسلے میں حاجی پیر محمد روڈ سے گزر رہا تھا کہ اس نے فٹ پاتھ پر ایک شخص کی لاش دیکھی، جس کے گرد متعدد افراد جمع تھے۔
چالان میں بتایا گیا ہے کہ مدعی کی اطلاع پر ریسکیو اہلکار موقع پر پہنچے اور لاش کو ایمبولینس کے ذریعے بغدادی تھانے منتقل کیا گیا۔ بعد ازاں پولیس نے لاش کا معائنہ کیا تو مقتول کی جیب سے ایک ڈبی برآمد ہوئی۔
تفتیشی دستاویزات کے مطابق برآمد ہونے والی گولڈن رنگ کی ڈبی پر’کوئین میڈم، پنکی ڈان، نام ہی کافی، انجوائے‘ درج تھا۔ بعد ازاں تحقیقات کے دوران معلوم ہوا کہ انمول عرف پنکی مبینہ طور پر یہ نشہ آور مواد فروخت کرتی ہے۔
تفتیشی افسر نے عبوری چالان میں مؤقف اختیار کیا ہے کہ کیس کی تفتیش ابھی مکمل نہیں ہوئی، تاہم قانونی مدت پوری ہونے کے باعث عبوری چالان جمع کرایا جا رہا ہے۔
دوسری جانب پراسیکیوشن حکام کا کہنا ہے کہ چالان کی اسکروٹنی کا عمل جاری ہے، جس کے دوران تفتیش میں موجود خامیوں اور نقائص کی نشاندہی کرکے انہیں دور کیا جائے گا۔ اسکروٹنی مکمل ہونے کے بعد عبوری چالان جوڈیشل مجسٹریٹ کی عدالت میں پیش کیا جائے گا۔
پولیس کے مطابق انمول عرف پنکی کے خلاف قتل کا مقدمہ لائنز ایریا کے رہائشی شیروز کی مدعیت میں بغدادی تھانے میں درج کیا گیا تھا، جس کی مزید تفتیش جاری ہے۔
