آزاد کشمیر حکومت کی جانب سے کالعدم جوائنٹ عوامی ایکشن کمیٹی (جے اے اے سی) کے خلاف کارروائیوں کا سلسلہ جاری ہے، جس کے تحت ضلع انتظامیہ اور پولیس نے ریاست مخالف سرگرمیوں کے الزام میں تنظیم کے مظفرآباد میں واقع مرکزی دفتر کو سیل کر دیا۔
پولیس اور انتظامیہ کی مشترکہ کارروائی کے دوران دفتر کی تلاشی لی گئی، جس میں ایک سب مشین گن، ایک 12 بور رائفل اور ایک پستول برآمد ہونے کا دعویٰ کیا گیا۔
حکام کے مطابق برآمد ہونے والے اسلحے کو تحویل میں لے کر مزید قانونی کارروائی کا آغاز کر دیا گیا ہے۔
چھاپے کے وقت مرکزی دفتر کے باہر عوام کی بڑی تعداد موجود تھی، تاہم کارروائی کے دوران کسی قسم کا احتجاج، ہنگامہ آرائی یا نعرہ بازی دیکھنے میں نہیں آئی اور صورتحال پرامن رہی۔
حکومتی مؤقف کے مطابق کالعدم قرار دی گئی کمیٹی کے خلاف کارروائیاں قانون کی عملداری اور ریاستی رٹ کے قیام کے لیے کی جا رہی ہیں۔
دوسری جانب ماہرین کا کہنا ہے کہ چھاپے کے دوران اسلحے کی برآمدگی اس امر کا ثبوت ہے کہ مذکورہ گروہ نام نہاد عوامی حقوق کے نام پر انتشار پھیلانے کی کوششوں میں مصروف تھا۔
ان کے مطابق ریاستی رٹ کے نفاذ، قانون کی حکمرانی اور عوامی نظم و ضبط کے تحفظ کے لیے ایسی قانونی کارروائیاں ناگزیر ہوتی ہیں۔
