خواتین کے ٹی 20 ورلڈ کپ 2026 کے آغاز پر گوگل نے اپنے ہوم پیج کو خصوصی ڈوڈل سے سجا دیا جس کے ذریعے دنیا کے سب سے بڑے ویمنز کرکٹ ایونٹ کو خراجِ تحسین پیش کیا گیا ہے۔
ورلڈ کپ کے پہلے روز گوگل کا روایتی لوگو کرکٹ کے رنگوں میں ڈھل گیا۔ ڈوڈل میں بیٹ، بال اور وکٹوں کی علامتوں کو منفرد انداز میں پیش کیا گیا ہے جو خواتین کرکٹ کی بڑھتی ہوئی مقبولیت اور عالمی سطح پر اس کے اثر و رسوخ کی عکاسی کرتا ہے۔
یہ بھی پڑھیں: گوگل جیمنی کی سروسز میں تکنیکی خرابی، دنیا بھر میں ہزاروں صارفین متاثر
دنیا بھر کے انٹرنیٹ صارفین جیسے ہی گوگل کا ہوم پیج کھولتے ہیں انہیں کرکٹ سے مزین خصوصی ڈیزائن دکھائی دیتا ہے جو اس بات کا اشارہ ہے کہ خواتین کے عالمی کرکٹ میلے کا باقاعدہ آغاز ہو چکا ہے۔
گوگل ماضی میں بھی اہم عالمی ایونٹس، قومی دنوں، تاریخی شخصیات اور بڑے کھیلوں کے مقابلوں کے موقع پر خصوصی ڈوڈلز جاری کرتا رہا ہے۔ اولمپکس، فٹبال ورلڈ کپ اور کرکٹ کے مختلف عالمی ٹورنامنٹس کے دوران بھی سرچ انجن کی جانب سے ایسے تخلیقی ڈیزائن پیش کیے جاتے رہے ہیں۔
یہ بھی پڑھیں: گوگل نے پکسل فونز کی اہم تصویری ایپ بند کردی
صارفین کا کہنا ہے کہ اس طرح کے ڈوڈلز نہ صرف عالمی ایونٹس کی تشہیر میں کردار ادا کرتے ہیں بلکہ لاکھوں صارفین کی توجہ بھی اپنی جانب مبذول کراتے ہیں جس سے کھیلوں اور دیگر شعبوں میں آگاہی بڑھانے میں مدد ملتی ہے۔
دوسری جانب خواتین ٹی 20 ورلڈ کپ 2026 میں دنیا کی صفِ اول کی ٹیمیں ٹائٹل کے حصول کے لیے ایک دوسرے کے مدمقابل ہوں گی۔ کرکٹ شائقین کو توقع ہے کہ رواں ایڈیشن میں سنسنی خیز مقابلے، شاندار انفرادی کارکردگیاں اور کئی نئے ریکارڈز دیکھنے کو ملیں گے۔
