اقوام متحدہ میں پاکستان کے مستقل مندوب عاصم افتخار احمد نے کہا ہے کہ مسقط ایکشن پلان رواداری، امن اور پرامن معاشروں کے قیام کے لیے ایک جدید اور مؤثر راستہ ہے، جو نفرت انگیز تقاریر اور تشدد پر اکسانے کے رجحانات کے خاتمے میں مدد دے سکتا ہے۔
مسقط ایکشن پلان کی افتتاحی تقریب سے خطاب کرتے ہوئے انہوں نے سلطنت عمان، اقوام متحدہ کے خصوصی مشیر برائے نسل کشی کی روک تھام کے دفتر اور پیس میکرز نیٹ ورک کو مسقط پلان آف ایکشن کی تیاری اور تکمیل پر مبارکباد پیش کی۔
یہ بھی پڑھیں: مشرق وسطیٰ میں پائیدار امن کے لیے سیاسی حل ضروری ہے، پاکستان
انہوں نے مختلف معزز شخصیات، خصوصاً روایتی اور مقامی قیادت کے نمائندوں کی بصیرت افروز آرا کو بھی سراہا۔
عاصم افتخار احمد نے کہا کہ نفرت انگیز بیانات اور نسل کشی جیسے جرائم کی ترغیب پیچیدہ عوامل سے جڑی ہوتی ہے، جن کا مؤثر اور جامع حل قومی و بین الاقوامی سطح پر مشترکہ ذمہ داری کے ساتھ ساتھ مقامی قیادت کے فعال کردار کا بھی متقاضی ہے۔
Pakistan Supports Muscat Plan of Action; Calls it Innovative Pathway to Address Hate Speech and Incitement to Genocide
– Our Press Release today pic.twitter.com/pS0oBkaTnm
— Permanent Mission of Pakistan to the UN (@PakistanUN_NY) June 12, 2026
انہوں نے کہا کہ قبائلی عمائدین، سردار اور مقامی رہنما تاریخ میں ہمیشہ مقامی حکمرانی، تنازعات کے حل اور ثالثی میں اہم کردار ادا کرتے رہے ہیں، اور آج بھی امن قائم کرنے، تنازعات کم کرنے اور انسانی ہمدردی کی سرگرمیوں میں پیش پیش ہیں۔
پاکستانی مندوب کے مطابق مسقط ایکشن پلان ایک ایسا جدید اقدام ہے جو روایتی اور مقامی قیادت کی ثقافتی ساکھ اور اثر و رسوخ کو بروئے کار لا کر نفرت انگیز تقاریر کے خلاف مؤثر کردار ادا کر سکتا ہے۔
مزید پڑھیں: پاکستان کا تنازعات کے حل کے لیے ثالثی کو اولین ترجیح بنانے کا مطالبہ
انہوں نے کہا کہ یہ منصوبہ ریاستی کوششوں کو مزید مضبوط بناتا ہے تاکہ منصفانہ، جامع اور پرامن معاشروں کی تشکیل ممکن ہو سکے۔
عاصم افتخار احمد نے کہا کہ آج کے دور میں بڑھتی ہوئی عدم برداشت، امتیاز اور اخراج کے تناظر میں پاکستان ایسے اقدامات کی حمایت کرتا ہے، اور اقوام متحدہ کی جانب سے ان رجحانات کے تدارک کے لیے بڑھتی ہوئی توجہ کو سراہتا ہے۔
انہوں نے کہا کہ پاکستان بین الاقوامی شراکت داروں کے ساتھ مل کر نفرت انگیز نظریات کے خاتمے اور معاشروں کو امن، مساوات اور ہم آہنگی کا گہوارہ بنانے کے لیے اپنی کوششیں جاری رکھے گا۔
