پنجاب اور خیبرپختونخوا کے مختلف علاقوں میں تیز ہواؤں اور بارش کے باعث معمولاتِ زندگی متاثر ہوئے جبکہ مختلف حادثات میں خاتون سمیت 5 افراد جاں بحق اور 45 افراد زخمی ہوگئے۔
میڈیا رپورٹس کے مطابق پنجاب کے مختلف شہروں لاہور، قصور، جھنگ، فیصل آباد، اوکاڑہ، چیچہ وطنی اور پاکپتن میں تیز ہواؤں کے ساتھ بارش ہوئی، جس سے موسم خوشگوار ہوگیا تاہم کئی مقامات پر شہریوں کو مشکلات کا سامنا بھی کرنا پڑا۔
یہ بھی پڑھیں:ملک کے مختلف علاقوں میں طوفانی بارشوں کا الرٹ، اسلام آباد و راولپنڈی میں اربن فلڈنگ کا خدشہ
بارش اور آندھی کے باعث لیسکو ریجن کے مختلف علاقوں میں بجلی کی فراہمی متاثر ہوئی اور متعدد علاقوں میں بجلی معطل ہوگئی، جبکہ متعلقہ عملے نے بحالی کے لیے کام شروع کر دیا۔
خیبرپختونخوا میں بھی بارش اور خراب موسم کے باعث مختلف حادثات پیش آئے۔ بنوں میں پیش آنے والے مختلف واقعات میں 4 افراد جان کی بازی ہار گئے جبکہ 16 افراد زخمی ہوئے۔
ڈی آئی خان میں طوفانی بارش کے دوران کئی مقامات پر درخت جڑوں سے اکھڑ گئے اور بجلی کے پول گرنے سے متعدد فیڈر ٹرپ کر گئے، جس کے نتیجے میں کئی علاقوں میں بجلی کی فراہمی متاثر ہوئی۔ مختلف حادثات میں 4 افراد زخمی بھی ہوئے۔
ادھر جنوبی وزیرستان لوئر کی تحصیل برمل میں بارش کے ساتھ ژالہ باری بھی ریکارڈ کی گئی، جس سے موسم مزید سرد ہوگیا اور بعض علاقوں میں معمولات زندگی متاثر ہوئے۔
حکام کے مطابق بارشوں کے دوران پیش آنے والے حادثات میں مجموعی طور پر 5 افراد جاں بحق اور 45 زخمی ہوئے ہیں، جبکہ متعلقہ ادارے متاثرہ علاقوں میں صورتحال کا جائزہ لے رہے ہیں۔
