بھارتی ریاست آسام کے جورہاٹ ایئر فورس اسٹیشن پر بھارتی فضائیہ کا طیارہ گر کر تباہ ہونے کے پیچھے تخریب کاری کا شبہ ظاہر کیا جارہا ہے۔
رپورٹس کے مطابق یونائیٹڈ لبریشن فرنٹ آف آسام (انڈیپنڈنٹ) پر شبہ ہے کہ اس نے عملے سے منسلک ایک فرد کے ذریعے اے این-32 طیارے میں دھماکا خیز مواد نصب کرایا۔
لینڈنگ کے مرحلے کے دوران دھماکا ہونے سے طیارے میں سوار 7 فوجی اہلکار اور عملے کا ایک رکن ہلاک ہوگئے، جبکہ 16 افراد زخمی ہوئے ہیں جنہیں علاج کے لیے اسپتال منتقل کردیا گیا ہے۔
یاد رہے کہ یونائیٹڈ لبریشن فرنٹ آف آسام (انڈیپنڈنٹ) آسام میں سرگرم واحد بڑا باغی تنظیمی گروپ سمجھا جاتا ہے۔
حکام کا کہنا ہے کہ حادثے کے وقت طیارہ معمول کے مطابق لینڈنگ کی کارروائی انجام دے رہا تھا، کہ ایئربیس کے احاطے میں گر کر تباہ ہو گیا، جس کے بعد اس میں آگ بھڑک اٹھی، جائے وقوعہ سے دھوئیں کے گہرے بادل اٹھتے دیکھے گئے۔
اے این-32 ایک 2 انجنوں والا ٹربو پروپ فوجی نقل و حمل کا طیارہ ہے جسے سابق سوویت یونین کے دور میں تیار کیا گیا تھا۔ یہ طیارہ کئی دہائیوں سے ہندوستانی فضائیہ کے ٹرانسپورٹ بیڑے کا اہم حصہ رہا ہے۔ اسے فوجیوں کی نقل و حرکت، رسد اور امدادی سامان کی ترسیل، فضائی سپلائی اور پیرا ٹروپرز کو اتارنے جیسے مختلف فوجی کاموں کے لیے استعمال کیا جاتا ہے۔
