ضلع بنوں کے علاقے ڈومیل میں جائیداد کے تنازع نے خونی رخ اختیار کرلیا، جہاں فائرنگ کے نتیجے میں ایک ہی خاندان کے چار افراد جاں بحق ہوگئے۔
میڈیا رپورٹ کے مطابق واقعہ تھانہ ڈومیل کی حدود میں اودین کلہ کے مقام پر پیش آیا، جہاں مبینہ طور پر جائیداد کے تنازع پر چچا زاد ملزمان نے فائرنگ کردی۔
یہ بھی پڑھیں:بنوں میں دہشتگردی کا نشانہ بننے والے اسسٹنٹ کمشنر کون تھے؟
حکام کے مطابق فائرنگ سے جاں بحق ہونے والوں میں ایک شخص اور اس کے تین بیٹے شامل ہیں۔ واقعے کے بعد ملزمان موقع سے فرار ہوگئے، جن کی گرفتاری کے لیے پولیس نے تلاش شروع کردی ہے۔
پولیس کا کہنا ہے کہ واقعے کی تحقیقات جاری ہیں جبکہ ملزمان کی گرفتاری کے لیے مختلف مقامات پر چھاپے مارے جا رہے ہیں۔
