ایپل اپنے آئی فون لانچ شیڈول میں ایک بڑی تبدیلی پر غور کر رہا ہے جس کے تحت معیاری آئی فون 18 کو 2026 کے بجائے 2027 کے اوائل میں متعارف کرایا جا سکتا ہے جبکہ پرو ماڈلز مقررہ وقت پر 2026 میں ہی لانچ کیے جائیں گے۔
غیر ملکی میڈیا رپورٹس کے مطابق ایپل کے اہم سپلائر لارگن پریسیژن کے چیئرمین لن این پِنگ نے حالیہ شیئر ہولڈرز اجلاس میں انکشاف کیا کہ ایک بڑے امریکی صارف نے اپنی نئی پراڈکٹ کی لانچ 2027 کی پہلی سہ ماہی تک منتقل کر دی ہے۔ اگرچہ انہوں نے کمپنی یا پراڈکٹ کا نام ظاہر نہیں کیا تاہم ٹیکنالوجی ماہرین اس بیان کو ایپل کی مستقبل کی آئی فون حکمتِ عملی سے جوڑ رہے ہیں۔
یہ بھی پڑھیں: آئی فون صارفین کیلئے خوشخبری، آئی او ایس 26 کے پوشیدہ فیچرز سامنے آگئے
رپورٹس کے مطابق ایپل آئندہ برسوں میں اپنے فلیگ شپ فونز کی لانچ کو دو مراحل میں تقسیم کر سکتا ہے۔ مجوزہ منصوبے کے تحت آئی فون 18 پرو، آئی فون 18 پرو میکس اور کمپنی کا پہلا فولڈ ایبل آئی فون 2026 کے دوسرے نصف میں متعارف کرائے جائیں گے جبکہ معیاری آئی فون 18، آئی فون 18e اور ممکنہ طور پر نئے آئی فون ایئر ماڈل کی رونمائی 2027 کے موسمِ بہار میں ہوگی۔
ماہرین کا کہنا ہے کہ اس تبدیلی سے ایپل کو سال بھر میں صارفین کی طلب کو متوازن رکھنے اور بڑھتی ہوئی پراڈکٹ لائن کی پیداوار کو بہتر انداز میں منظم کرنے میں مدد مل سکتی ہے۔
یہ بھی پڑھیں: ایپل نے فولڈ ایبل آئی فون کی لانچنگ کیوں مؤخر کی؟
دوسری جانب فولڈ ایبل آئی فون کو ایپل کی 2026 کی سب سے نمایاں پراڈکٹ قرار دیا جا رہا ہے۔ افواہوں کے مطابق اس ڈیوائس میں کتاب نما فولڈنگ ڈیزائن، بڑی اندرونی اسکرین اور چھوٹی بیرونی ڈسپلے دی جائے گی جبکہ اس کی قیمت تقریباً 2 ہزار ڈالر تک ہو سکتی ہے۔
آئی فون 18 کے حوالے سے سامنے آنے والی لیکس کے مطابق فون میں نئی نسل کا A20 پروسیسر، 12 جی بی تک ریم، بہتر فرنٹ کیمرہ اور زیادہ روشن ڈسپلے متوقع ہیں۔ بعض رپورٹس میں یہ بھی دعویٰ کیا گیا ہے کہ ایپل ڈائنامک آئی لینڈ کے چھوٹے ورژن کو پوری آئی فون 18 سیریز میں متعارف کرا سکتا ہے۔
یہ بھی پڑھیں: فولڈ ہوجانے والا آئی فون سال رواں میں لانچ ہوگا، ایپل کمپنی کہاں تانک جھانک کر رہی ہے؟
تاہم ایپل نے ان اطلاعات پر تاحال کوئی باضابطہ ردعمل نہیں دیا جس کے باعث کمپنی کے مستقبل کے منصوبوں کے بارے میں یقین سے کچھ کہنا قبل از وقت ہوگا۔
