سعودی عرب کے الباحہ ریجن میں واقع پرنس حسام پارک اس موسمِ گرما میں سیاحوں کی بڑی توجہ کا مرکز بن گیا ہے، جہاں شیشے کا معلق پل (گلاس برج) اور قدرتی مناظر سیاحوں کو منفرد تجربہ فراہم کر رہے ہیں۔
الباحہ، سعودی عرب میں اس سال موسمِ گرما کے دوران پرنس حسام پارک سیاحوں اور مقامی افراد کے لیے ایک نمایاں تفریحی مقام کے طور پر ابھر کر سامنے آیا ہے۔ یہ پارک اپنی بلند پہاڑیوں، وادیوں اور بادلوں سے گھرے قدرتی مناظر کی بدولت خاص اہمیت رکھتا ہے، جہاں سے شہر الباحہ اور تہامہ کے علاقے کا دلکش نظارہ کیا جا سکتا ہے۔
تتجه أنظار زوار منطقة الباحة خلال موسم الصيف إلى مساطب متنزه الأمير حسام بالقيم، التي أصبحت إحدى أبرز الوجهات السياحية المفتوحة في المنطقة، بفضل موقعها الإستراتيجي المطل على مدينة الباحة والقطاع التهامي، وما توفره من مشاهد بانورامية تجمع بين الجبال والوديان والسحب، التي تعانق… pic.twitter.com/ubeGlXuVq7
— وكالة الأنباء السياحية (@tna_media24) June 16, 2026
بین الاقوامی خبر رساں ادارے ایس پی اے کے مطابق پارک کا سب سے نمایاں اور پرکشش حصہ اس کا شیشے کا معلق پل ہے، جو مضبوط اسٹیل اور شفاف شیشے کے پینلز سے بنایا گیا ہے۔ یہ پل تقریباً 85 میٹر طویل ہے اور زمین سے 40 میٹر سے زائد بلندی پر واقع ہے، جس پر چلنے والے افراد کو نیچے گہری وادیوں، سبز پہاڑی ڈھلانوں اور قدرتی مناظر کا براہِ راست نظارہ حاصل ہوتا ہے۔
یہ منفرد پل نہ صرف ایڈونچر کے شوقین افراد کے لیے کشش رکھتا ہے بلکہ خاندانوں اور سیاحوں کو بھی ایک یادگار تجربہ فراہم کرتا ہے، جو قدرتی حسن اور جدید تعمیراتی فن کا امتزاج پیش کرتا ہے۔
یہ بھی پڑھیں:سعودی عرب میں نایاب ریم غزال کی جنگلی ماحول میں افزائشِ نسل دوبارہ شروع
پارک میں تفریحی سرگرمیوں کا بھی بھرپور انتظام کیا گیا ہے، جہاں موسمِ گرما کے دوران مختلف ثقافتی اور فنکارانہ پروگرام، انٹرایکٹو سرگرمیاں اور مقابلے منعقد کیے جاتے ہیں۔ اس کے علاوہ پروڈکٹیو فیملیز کے لیے خصوصی اسٹالز بھی قائم کیے گئے ہیں تاکہ وہ اپنی مصنوعات کی نمائش اور فروخت کر سکیں۔
پرنس حسام پارک میں ایک وسیع مرکزی چوک بھی موجود ہے جس میں 5 ہزار مربع میٹر پر محیط انٹرایکٹو فاؤنٹین نصب ہے۔ یہاں 1000 افراد کی گنجائش والا اوپن ایئر تھیٹر، بچوں کے کھیلنے کے مخصوص علاقے، دکانیں، کیفے، سروس کیوسک اور مسجد بھی موجود ہے، جو اسے ایک مکمل تفریحی مرکز بناتے ہیں۔
سیاحوں کی بڑھتی ہوئی آمد نے اس مقام کو الباحہ ریجن کے اہم ترین سمر ٹورازم ہاٹ سپاٹس میں شامل کردیا ہے، جہاں قدرتی حسن اور جدید سہولیات ایک ساتھ دستیاب ہیں۔
