میٹا کی ملکیت والی واٹس ایپ اینڈرائیڈ اور آئی او ایس صارفین کے لیے پرائیویسی اور پیغام رسانی کے تجربے کو بہتر بنانے کے لیے نئے فیچرز پر کام کر رہی ہے۔
واٹس ایپ کا نیا فیچر ویو ونس ٹیکسٹ میسجز ہے، جس کے ذریعے صارف ایسا پیغام بھیج سکیں گے جو صرف ایک مرتبہ پڑھنے کے بعد خودکار طور پر حذف ہو جائے گا۔
یہ بھی پڑھیں: واٹس ایپ بغیر کھولے وائس نوٹس بھیجنے کی سہولت کا امکان
اس فیچر کو استعمال کرنے کے لیے صارف کو سینڈ بٹن کو دیر تک دبانا ہوگا اور سینڈ ایز ویو ونس کا آپشن منتخب کرنا ہوگا۔
یہ فیچر انفرادی چیٹس اور گروپ چیٹس میں دستیاب ہونے کا امکان ہے، تاہم چینلز کو شاید یہ اپ ڈیٹ نہ مل سکے۔
یہ فیچر اس وقت آزمائشی مرحلے میں ہے اور تاحال عوامی بیٹا ورژن میں دستیاب نہیں ہے۔ اس سے قبل واٹس ایپ تصاویر، ویڈیوز اور وائس میسجز کے لیے ویو ونس آپشن فراہم کر چکی ہے۔
اس کے ساتھ ساتھ واٹس ایپ اینڈرائیڈ کے لیے ایک نیا وائس میسج ویجٹ بھی متعارف کرانے کی تیاری کر رہی ہے۔ اس ویجٹ کی مدد سے صارف ایپ کھولے بغیر ہی موبائل کی ہوم اسکرین سے براہِ راست وائس نوٹ ریکارڈ کر کے بھیج سکیں گے۔
یہ بھی پڑھیں: فیفا ورلڈ کپ 2026: میٹا نے انسٹاگرام، واٹس ایپ اور فیس بک کے نئے فیچرز متعارف کرا دیے
متوقع طور پر یہ ویجٹ 3×1 کے کمپیکٹ اور سائز تبدیل کیے جا سکنے والے فارمیٹ میں نظر آئے گا، جس میں مائیکروفون کا آئیکون اور ٹیپ ٹو ریکارڈ کا آپشن موجود ہوگا۔
ریکارڈنگ مکمل ہونے کے بعد صارف رابطوں کا انتخاب کر کے وائس نوٹ بھیج سکیں گے، جبکہ ایک ہی وائس نوٹ کو بیک وقت متعدد افراد کو بھیجنے کا آپشن بھی شامل کیے جانے کا امکان ہے۔
واٹس ایپ نے ان دونوں فیچرز کی باضابطہ ریلیز کی تاریخ کا ابھی تک اعلان نہیں کیا، کیونکہ یہ ابھی ترقی اور آزمائش کے مرحلے میں ہیں۔
