وفاقی وزیرِ دفاع خواجہ محمد آصف نے واضح کیا ہے کہ بھارت کی جانب سے جنگ سے متعلق حالیہ بیان بازی دراصل اس کی سفارتی و عسکری شکست کی خفت کا نتیجہ ہے۔
انہوں نے دوٹوک الفاظ میں تنبیہ کی کہ اگر بھارت نے دوبارہ کسی بھی قسم کی جارحیت کی کوشش کی، تو پاکستان کی جانب سے اسے پہلے سے بھی زیادہ سخت اور دندان شکن جواب دیا جائے گا کیونکہ قومی سلامتی پر کوئی سمجھوتہ نہیں کیا جا سکتا۔
یہ بھی پڑھیں:آزاد کشمیر: تشدد کا راستہ اختیار کرنے والے جمہوری عمل نہیں چاہتے، خواجہ آصف
جمعہ کو وفاقی دارالحکومت اسلام آباد میں میڈیا سے گفتگو کرتے ہوئے وزیرِ دفاع نے پڑوسی ممالک اور خطے کی سیکیورٹی کی صورتحال پر تفصیلی گفتگو کی۔
انہوں نے واضح کیا کہ پاکستان کو افغانستان کی سرزمین کے راستے کسی بھی قسم کی پراکسی جنگ قابلِ قبول نہیں ہے۔
افغان حکومت کو تنبیہ اور آزاد کشمیر میں بھارتی مداخلت
خواجہ آصف نے افغان عبوری حکومت پر زور دیا کہ وہ اپنی سرزمین کو پاکستان کے خلاف استعمال ہونے سے روکے اور اپنی حدود میں موجود دہشتگرد عناصر کے خلاف مؤثر و فیصلہ کن کارروائی عمل میں لائے۔
انہوں نے کہا کہ’بھارت اس وقت آزاد کشمیر میں انتشار اور بدامنی پھیلانے کی منظم کوششیں کر رہا ہے اور کشمیر سے متعلق حالیہ اشتعال انگیز بیانات دراصل اسی ناپاک بھارتی بیانیے کی عکاسی کرتے ہیں‘۔
مزید پڑھیں:عوامی ایکشن کمیٹی آزاد کشمیر میں انتخابی عمل کو سبوتاژ کرنا چاہتی ہے، وزیر دفاع خواجہ آصف
وزیرِ دفاع نے انکشاف کیا کہ برطانیہ میں بیٹھے ہوئے بعض عناصر بھی اس وقت بھارتی ایجنڈے کو ہوا دے رہے ہیں اور پاکستان کے خلاف پروپیگنڈے میں مصروف ہیں۔
کشمیریوں کی قربانیاں اور حوصلہ
مقبوضہ و آزاد کشمیر کی صورتحال پر بات کرتے ہوئے خواجہ آصف کا کہنا تھا کہ بھارت کے بدترین مظالم اور ریاستی دہشتگردی کے باوجود کشمیریوں کا حوصلہ بلند ہے اور مقبوضہ وادی کے عوام آج بھی پاکستان سے اپنی غیر مشروط وابستگی کا کھل کر اظہار کر رہے ہیں۔
انہوں نے مزید کہا کہ پاکستان نے مسئلہ کشمیر کے حل اور کشمیریوں کے حقِ خودارادیت کے لیے بے شمار قربانیاں دی ہیں، اس لیے آزاد کشمیر کے عوام کو اپنی اس آزادی کی قدر کرنی چاہیے۔
