فیفا ورلڈ کپ 2026 میں پیراگوئے نے شاندار دفاعی کھیل پیش کرتے ہوئے ترکیہ کو 0-1 سے زیر کرتے ہوئے ایونٹ سے باہر کردیا۔ ایک کھلاڑی کم ہونے کے باوجود پیراگوئے کی ٹیم نے اپنی برتری کا کامیابی سے دفاع کیا اور اہم فتح اپنے نام کرلی۔
میچ کا واحد گول مڈفیلڈر میٹیاس گالارزا نے کھیل شروع ہونے کے صرف 64ویں سیکنڈ میں اسکور کیا۔
Türkiye have been eliminated from the World Cup‼️
Paraguay scored in the first 64 seconds and played the entire second half against Türkiye with 10 men 🤯 pic.twitter.com/QLYqs0aiTE
— ESPN FC (@ESPNFC) June 20, 2026
انہوں نے قریباً 25 میٹر کے فاصلے سے طاقتور شاٹ لگایا جو سیدھا جال میں جا پہنچا۔ یہ گول اب تک جاری ٹورنامنٹ کا تیز ترین گول بھی قرار پایا۔
اس سے چند گھنٹے قبل مراکش کے اسماعیل سیباری نے اسکاٹ لینڈ کے خلاف 71ویں سیکنڈ میں گول کر کے یہ ریکارڈ قائم کیا تھا، جسے گالارزا نے مزید بہتر بنا دیا۔
پہلے ہاف کے اضافی وقت میں پیراگوئے کو اس وقت بڑا نقصان اٹھانا پڑا جب مڈفیلڈر میگوئل المیرون کو براہ راست ریڈ کارڈ دکھا کر میدان سے باہر بھیج دیا گیا۔
المیرون ورلڈ کپ میں نئے نافذ کیے گئے اس ضابطے کے تحت سزا پانے والے پہلے کھلاڑی بنے، جس کے مطابق منہ پر ہاتھ رکھ کر گفتگو کرنا خلافِ قواعد قرار دیا گیا ہے۔
10 کھلاڑیوں کے ساتھ بقیہ میچ کھیلنے کے باوجود پیراگوئے نے ترکیہ کے مسلسل حملوں کو ناکام بنایا اور 0-1 کی برتری برقرار رکھتے ہوئے کامیابی حاصل کر لی۔
یہ فتح پیراگوئے کے لیے خاص اہمیت رکھتی ہے، کیونکہ ایونٹ کے اپنے پہلے میچ میں اسے میزبان امریکا کے ہاتھوں 4-1 کی بھاری شکست کا سامنا کرنا پڑا تھا، تاہم اس کامیابی کے ذریعے ٹیم نے شاندار انداز میں واپسی کی۔
