آزادجموں و کشمیر کے وزیراعظم فیصل ممتاز راٹھور سے آل کشمیر نیوز پیپر سوسائٹی (اے کے این ایس) کے صدر سردار زاہد تبسم نے وفد کے ہمراہ ملاقات کی، جس میں آزاد کشمیر کی موجودہ صورتحال سمیت مختلف امور پر تبادلہ خیال کیا گیا۔
ملاقات میں آل کشمیر نیوز پیپر سوسائٹی کے وفد نے وزیراعظم کو راولاکوٹ کے دورے اور مختلف حلقوں سے ہونے والی گفتگو سے آگاہ کیا۔ وفد میں چیف ایڈیٹر روزنامہ صدائے چنار چوہدری امجد، چیف ایڈیٹر روزنامہ پارلیمنٹ ٹائمز چوہدری جاوید اقبال، چیف ایڈیٹر کنٹری نیوز سردار حمید، ایڈیٹر صدائے چنار اعجاز عباسی، چیف ایڈیٹر ناگزیر سید دلاور بخاری، چیف ایڈیٹر جنت نظیر اعجاز خان اور سینئر صحافی سید علی حسنین بخاری شامل تھے۔
یہ بھیی پڑھیں:آزاد کشمیر صورتحال: وزیراعظم فیصل ممتاز راٹھور نے پارلیمانی پارٹی کا اجلاس طلب کرلیا، اہم فیصلے متوقع
اس موقع پر وزیراعظم فیصل ممتاز راٹھور نے کہا کہ ریاست کے چیف ایگزیکٹو کی حیثیت سے عوام کے جان و مال کا تحفظ حکومت کی اولین ذمہ داری ہے۔ انہوں نے کہا کہ انہوں نے کالعدم ایکشن کمیٹی سے متعدد بار رابطہ کیا، آل پارٹیز کانفرنس میں شرکت کی دعوت دی اور شوکت نواز میر کے گھر جانے کی خواہش کا اظہار کیا، تاہم مثبت جواب نہیں ملا۔
وزیراعظم نے کہا کہ نظریہ پاکستان اور نظریہ الحاق پاکستان سے متعلق کسی قسم کی لچک کا مظاہرہ نہیں کیا جا سکتا، کیونکہ یہ کشمیری قوم کا متفقہ نظریہ ہے۔
انہوں نے کہا کہ کالعدم ایکشن کمیٹی کے ذمہ داران کی جانب سے پاک فوج اور اداروں کے خلاف غیر ذمہ دارانہ بیانات قابل قبول نہیں، تاہم قانون نافذ کرنے والے ادارے اب بھی تحمل کا مظاہرہ کر رہے ہیں۔
یہ بھی پڑھیں:آزاد کشمیر میں 5 جی سروسز کا آغاز، وزیراعظم فیصل ممتاز راٹھور کی عوام کو خوشخبری
فیصل ممتاز راٹھور کا کہنا تھا کہ سیاسی عمل کے ذریعے ریاست کو اس مقام تک پہنچایا گیا ہے، کسی گروہ کو طاقت کے زور پر اپنے نظریات مسلط کرنے کی اجازت نہیں دی جا سکتی۔
انہوں نے کہا کہ قانون کے دائرے میں رہتے ہوئے تمام ممکنہ راستے اختیار کیے جائیں گے اور اسی کے مطابق فیصلے کیے جائیں گے۔
