دنیا بھر کی طرح پاکستان میں بھی آج سال کا طویل ترین دن اور مختصر ترین رات ہے۔
فلکیاتی حساب سے زمین کے شمالی نصف کرے میں موجود ممالک آج موسمِ گرما کے طویل ترین دن کا تجربہ کر رہے ہیں، جبکہ جنوبی نصف کرے میں آج سال کا مختصر ترین دن اور طویل ترین رات ہے، جس کے ساتھ ہی وہاں موسمِ سرما کا باقاعدہ آغاز ہو گیا ہے۔
پاکستان میں دن کا دورانیہ
پاکستان میں جغرافیائی مقامات کے لحاظ سے آج دن کا دورانیہ 14 سے 15 گھنٹے کے درمیان رہے گا۔
یہ بھی پڑھیں:خانہ کعبہ کے عین اوپر سورج کا ظہور، قبلہ رخ درست کرنے کا نادر فلکیاتی منظر
ماہرینِ فلکیات کے مطابق، یہ سلسلہ زیادہ دیر نہیں چلے گا اور یکم جولائی کے بعد سے دن کا دورانیہ بتدریج کم ہونا شروع ہو جائے گا، یہاں تک کہ 22 ستمبر کو دن اور رات کا دورانیہ ایک بار پھر تقریباً برابر ہو جائے گا۔
دنیا بھر میں دن رات مختلف
دنیا کا سب سے طویل دن امریکی ریاست الاسکا کے وسطی حصے میں ریکارڈ کیا جا رہا ہے، جہاں سورج کی روشنی کا دورانیہ 21 گھنٹے سے بھی زائد ہوگا۔
براعظم انٹارکٹیکا
قطبِ جنوبی کے مرکزی مقام یعنی انٹارکٹیکا میں صورتحال بالکل برعکس ہے، جہاں سورج مکمل طور پر غائب ہے اور وہاں مسلسل 24 گھنٹے تاریکی کا راج ہے۔
سویڈن میں ’مڈ سمر‘ کا منفرد جشن
دلچسپ بات یہ ہے کہ یورپی ملک سویڈ ن میں اس دن کو ایک تہوار کی طرح منایا جاتا ہے جسے ’مڈ سمر‘ کہتے ہیں۔
مزید پڑھیں:ہزاروں سال پرانا فلکیاتی منظر: شہابی بارش 22 اپریل کو عروج پر ہوگی
سویڈش روایات کے مطابق یہ تہوار ہمیشہ جمعہ کے روز منایا جاتا ہے، اسی لیے وہاں اس سال کا طویل ترین دن باقاعدہ طور پر 23 جون کو قرار دیا جائے گا جہاں لوگ روایتی رقص اور گیتوں کے ساتھ اس کا استقبال کریں گے۔
