وفاقی وزیر مذہبی امور سردار محمد یوسف نے حج 2027 رجسٹریشن کا باضابطہ آغاز کرتے ہوئے کہا ہے کہ قومی آئی ٹی بورڈ کے تعاون سے حج نظام کو مکمل طور پر ڈیجیٹائز کیا جا رہا ہے تاکہ شفافیت اور سہولت کو یقینی بنایا جا سکے۔
اسلام آباد میں تقریب سے خطاب اور میڈیا سے گفتگو کرتے ہوئے انہوں نے بتایا کہ حج 2027 کے لیے رجسٹریشن آج سے شروع کر دی گئی ہے اور یہ مکمل طور پر مفت ہوگی، جس کے لیے کوئی فیس وصول نہیں کی جائے گی۔
انہوں نے کہا کہ رجسٹریشن ’پہلے آئیے، پہلے پائیے‘ کی بنیاد پر ہوگی اور سرکاری و نجی دونوں حج اسکیموں کے لیے رجسٹریشن لازمی قرار دی گئی ہے۔
وفاقی وزیر نے کہا کہ رجسٹریشن کے بغیر حج 2027 کے لیے درخواست جمع نہیں کرائی جا سکے گی۔ عازمین کے لیے کارآمد پاسپورٹ لازمی ہوگا، جس کی معیاد کم از کم 26 نومبر 2027 تک ہونی چاہیے۔
انہوں نے بتایا کہ ایک ہی خاندان کے افراد مشترکہ طور پر رجسٹریشن کرا سکیں گے جبکہ بیرون ملک مقیم پاکستانی بھی دنیا کے کسی بھی ملک سے رجسٹریشن کروا سکیں گے۔
وفاقی وزیر مذہبی امور سردار محمد یوسف کی میڈیا سے گفتگو قومی آئی ٹی بورڈ کے تعاون سے حج کو ڈیجیٹائز کردیاہے۔ حج 2027 کے لئے رجسٹریشن آج شروع کردی گئی ہے۔ بیرون ملک پاکستانی بھی کسی بھی ملک سے حج رجسٹریشن کروا سکیں گے۔@iamabidmalik pic.twitter.com/805Ts0QIJC
— Media Talk (@mediatalk922) June 22, 2026
سردار محمد یوسف کے مطابق حج رجسٹریشن ملک بھر کے مقررہ بینکوں کے ذریعے کرائی جا سکے گی جبکہ آن لائن رجسٹریشن کی سہولت بھی دستیاب ہوگی۔
وزارت مذہبی امور نے اس حوالے سے باقاعدہ شیڈول جاری کر دیا ہے اور رجسٹریشن مکمل ہونے کے بعد ہی سرکاری یا نجی حج اسکیم کا انتخاب ممکن ہوگا۔
انہوں نے حج 2026 کو کامیاب ترین حج قرار دیتے ہوئے کہا کہ پاکستانی عازمین انتظامات سے انتہائی مطمئن رہے اور وزارت کو ایک فیصد سے بھی کم شکایات موصول ہوئیں۔
ان کا کہنا تھا کہ وزیراعظم کی ہدایات پر مکمل عمل درآمد کیا گیا جبکہ سعودی حکومت اور پاکستان میں سعودی سفیر نے بھی بھرپور تعاون فراہم کیا۔
وفاقی وزیر نے بتایا کہ رواں سال لاہور سے بھی روڈ ٹو مکہ منصوبے کا آغاز کیا گیا اور قریباً 80 فیصد پاکستانی عازمین اس سہولت سے مستفید ہوئے۔
مزید پڑھیں: وفاقی وزیر مذہبی امور کا مدینہ پاکستان ہاؤس کا دورہ، حج انتظامات پر اطمینان کا اظہار
انہوں نے کہا کہ وزارت حج 2026 کے عازمین کو بعض مدات میں بچ جانے والی رقوم واپس کرنے کے تخمینے پر کام کر رہی ہے اور روایت کے مطابق امسال بھی حاجیوں کو رقوم واپس کی جائیں گی۔
انہوں نے مزید کہا کہ پاکستان کی مسلم آبادی 23 کروڑ سے تجاوز کر چکی ہے اور سعودی حکومت کے ساتھ حج کوٹہ بڑھانے کے حوالے سے بات چیت جاری ہے۔ ان کے مطابق پاکستان کا حج کوٹہ قریباً 2 لاکھ 30 ہزار بنتا ہے۔
