ارجنٹائن کے کپتان لیونل میسی آج آسٹریا کے خلاف فیفا ورلڈ کپ 2026 کے گروپ مرحلے کے میچ میں ایک اور تاریخی سنگ میل عبور کرنے کے قریب ہیں۔
مزید پڑھیں: لیونل میسی کے والد کی طبیعت ناساز، خاندان نے رازداری کی اپیل کر دی
میسی اس وقت جرمنی کے سابق اسٹار میروسلاو کلوزے کے ساتھ ورلڈ کپ کی تاریخ میں مشترکہ طور پر سب سے زیادہ 16 گول کرنے والے کھلاڑی ہیں۔ ارجنٹائن کے عالمی شہرت یافتہ کپتان نے الجزائر کے خلاف افتتاحی میچ میں ہیٹ ٹرک اسکور کرکے یہ ریکارڈ برابر کیا تھا اور اب صرف ایک گول انہیں ورلڈ کپ کی تاریخ کا تنہا سب سے بڑا گول اسکورر بنا سکتا ہے۔
39ویں سالگرہ کے قریب پہنچنے والے میسی اب بھی ارجنٹائن ٹیم کے لیے مرکزی حیثیت رکھتے ہیں۔ مڈفیلڈر الیکسس میک ایلسٹر کا کہنا ہے کہ میسی ٹیم کی سب سے اہم شخصیت ہیں اور ان کی موجودگی پورے اسکواڈ کے لیے حوصلے کا باعث ہے۔
دوسری جانب کوچ لیونل اسکالونی نے کہا کہ موجودہ ارجنٹائنی ٹیم میسی کے گرد ایک مضبوط اور دوستانہ ماحول رکھتی ہے، جہاں ہر کھلاڑی دل و جان سے اپنے کپتان کے لیے کھیلتا ہے۔
مزید پڑھیں:لیونل میسی انجری کے باوجود ارجنٹینا کے ورلڈ کپ اسکواڈ میں شامل
آسٹریا نے اپنے پہلے میچ میں اردن کو 1-3 سے شکست دے کر شاندار آغاز کیا تھا، اس لیے ارجنٹائن کو ایک سخت مقابلے کا سامنا ہوگا۔ تاہم دفاعی چیمپیئن ارجنٹائن فتح کی صورت میں گروپ ایل میں سرفہرست پوزیشن مضبوط کرتے ہوئے ناک آؤٹ مرحلے کے لیے اپنی راہ مزید ہموار کر سکتا ہے۔
فٹبال شائقین کی نظریں اب ڈیلس پر مرکوز ہیں، جہاں یہ دیکھنا دلچسپی کا باعث ہوگا کہ آیا لیونل میسی میروسلاو کلوزے کو پیچھے چھوڑ کر فیفا ورلڈ کپ کی تاریخ کے سب سے زیادہ گول کرنے والے کھلاڑی بن پاتے ہیں یا نہیں۔
