لاہور میں بسنت کے موقع پر ٹریفک انتظامات پر اٹھنے والے بھاری اخراجات کی تفصیلات سامنے آگئی ہیں۔
رپورٹ کے مطابق ٹریفک پولیس نے لاہور میں بسنت کے دوران ٹریفک کی روانی کو یقینی بنانے، شہریوں کے لیے آگاہی مہم چلانے اور دیگر ضروری سہولیات کی فراہمی کے لیے مجموعی طور پر 14 کروڑ 57 لاکھ 63 ہزار روپے خرچ کیے۔
یہ بھی پڑھیں: لاہور میں بسنت کے اخراجات اور سیکیورٹی اقدامات کی تفصیلات طلب
ان تمام انتظامات پر آنے والی لاگت کی ادائیگی اور رقم کی باقاعدہ منظوری کے لیے پنجاب پولیس نے صوبائی حکومت سے بجٹ میں سپلیمنٹری گرانٹ کی منظوری مانگ لی ہے تاکہ ان اخراجات کو سرکاری سطح پر ایڈجسٹ کیا جاسکے۔
واضح رہے کہ پنجاب میں قیمتی جانوں کے ضیاع اور خونی ڈور کے باعث سال 2007 سے بسنت کے تہوار پر سخت پابندی عائد تھی جو 18 برس تک برقرار رہی۔
رواں سال فروری میں حکومتِ پنجاب نے ‘پنجاب کائٹ فلائنگ آرڈیننس 2025’ کے تحت انتہائی سخت ضوابط اور حفاظتی اقدامات کے ساتھ پہلی بار سرکاری سطح پر اس ثقافتی فیسٹیول کو دوبارہ بحال کرنے کی مشروط اجازت دی تھی۔
یہ بھی پڑھیں:لاہور کے بعد کوئٹہ میں بھی بسنت، شہری تہوار کے لیے کتنے تیار؟
بسنت کے دوران لاہور میں ٹریفک پولیس اور ضلعی انتظامیہ کی جانب سے شہریوں کی حفاظت، موٹر سائیکلوں پر سیفٹی راڈز کی فراہمی اور سڑکوں پر حفاظتی نیٹ لگانے جیسے غیر معمولی انتظامات پر یہ کروڑوں روپے کے اخراجات اٹھے ہیں۔
